“მათთვის, ვინც ბილეთის გარეშე დარჩა, რესპუბლიკის მოედანზე, საქართველო-ჩეხეთის მატჩის ღია ჩვენებას გავმართავთ“, — ამის შესახებ დედაქალაქის მერმა, კახა კალაძემ დღეს გამართულ თბილისის მთავრობის სხდომაზე განაცხადა.

მისი თქმით, პოლიტიკოსებისგან ადგილი ჰქონდა გარკვეულ სპეკულაციებს, თითქოს ჩეხეთთან მატჩის გამართვა დინამოს სტადიონზე უსაფრთხოა, პრობლემას არ წარმოადგენს, უბრალოდ, არ არსებობს ხელისუფლების პოლიტიკური ნება, რაც სიმართლეს არ შეესაბამება.

მერმა განაცხადა, რომ კარგად ესმის ის გულისტკივილი, რაც საქართველო-ჩეხეთის მატჩზე უბილეთოდ დარჩენილ მოქალაქეებს გაუჩნდათ, თუმცა, ფეხბურთის ფედერაციამ აღნიშნულთან დაკავშირებითვრცელი განმარტებები უკვე გააკეთა.

“ბოლო დღეების განმავლობაში ბევრი აბსურდული განცხადება მოვისმინეთ, მოვისმინეთ პოლიტიკოსების მხრიდან სპეკულაციები, თითქოს მატჩის გამართვა დინამოს სტადიონზე სრულიად უსაფრთხოა, პრობლემას არ წარმოადგენს, უბრალოდ არ არსებობს ხელისუფლების პოლიტიკური ნება. არ შევალ დეტალებში, არ გავაკეთებ განცხადებას ამ სპეკულაციებზე. ვფიქრობ, ყველა მოაზროვნე ადამიანი, ვისაც ანალიზის გაკეთების უნარი აქვს, ყველაფერს კარგად ხედავს. ასეთ პოლიტიკოსებს შესაბამის პასუხს გასცემს. ფეხბურთის ფედერაცია უკვე გამოეხმაურა შესაბამისი განცხადებით და მეტს ვერაფერს დავამატებ.

კიდევ ერთხელ გავიმეორებ, გულშემატკივრის ქომაგობა ძალიან მნიშვნელოვანია ჩვენი ბიჭებისთვის, ამიტომ ყველანი ვისურვებდით, რაც შეიძლება მეტი მაყურებელი დასწრებოდა მატჩს.

მიხეილ მესხის სტადიონი იქნება გადავსებული. მინდა გულშემატკივარს მივაწოდო ინფორმაცია, ვინც უბილეთოდ დარჩა, მინდა გაცნობოთ, რომ 7 სექტემბერს რესპუბლიკის მოედანზე მოეწყობა შესაბამისი სივრცე, იქნება დიდი ეკრანი და ყველა პირობა საიმისოდ, რომ რაც შეიძლება ბევრმა გულშემატკივარმა შეძლოს ემოციების გაზიარება და საქართველოს ნაკრების ქომაგობა“, — განაცხადა კახა კალაძემ.

შეგახსენებთ, რომ საქართველო-ჩეხეთის მატჩი მიხეილ მესხის სახელობის სტადიონზე 7 სექტემბერს გაიმართება. მატჩის ბილეთები 1 საათში გაიყიდა. მიხეილ მესხის სახელობის სტადიონი 27 223 გულშემატკივარზეა გათვლილი. ამ ფაქტმა გულშემატკივრების უკმაყოფილება გამოიწვია, ისინი მატჩის ბორის პაიჭაძის ეროვნულ სტადიონზე გამართვას მოითხოვდნენ, რომელიც 54 139 გულშემატკივარზეა გათვლილი.