როგორ ჩანს, Game of Thrones-ის დასასრულის მონელება არა მხოლოდ ფანებს, სერიალში მონაწილე მსახიობებსაც უჭირთ ჯერ კიდევ. კიტ ჰარინგტონი, რომელიც ეპიკურ ფენტეზი სერიალში ერთ-ერთ მთავარ როლს, ჯონ სნოუს პერსონაჟს, ასახიერებდა, ჟურნალ GQ-სთან ინტერვიუში ამბობს, რომ სერიალის ბოლო, მერვე სეზონში შეცდომები დაუშვეს, მაგრამ "სხვა გამოსავალი" არ იყო. ამის მიზეზი კი, ინგლისელი მსახიობის თქმით, ისაა, რომ შემოქმედებით გუნდს პროექტის გასაგრძელებლად საჭირო ენერგია აღარ ეყო.

"მგონი, თუკი სერიალის ასეთი დასასრული რამის ბრალია, ალბათ იმის, რომ ყველანი გადაქანცულები ვიყავით, გაგრძელება აღარ შეგვეძლო", — ამბობს ჰარინგტონი, — "მესმის, რომ ზოგიერთი დასასრულს მიფუჩეჩებულად მიიჩნევს და შეიძლება მათ მეც დავეთანხმო. მაგრამ, არ მგონია, რომ სხვა გამოსავალი არსებობდა. ბოლო სეზონის გადაღებებიდან ჩემს ფოტოებს რომ ვუყურებ, გადაღლილი, ძალაგამოცლილი ვჩანვარ. კიდევ ერთ სეზონზე მუშაობას ვეღარ შევძლებდი".

ჰარინგტონი, ემილია კლარკთან, მეისი უილიამსთან და სხვა მსახიობებთან ერთად, HBO-ის ამ გახმაურებულ სერიალზე რვა სეზონის განმავლობაში, 2011 წლიდან 2019 წლამდე მუშაობდა. ჯორჯ რ.რ. მარტინის ყინულისა და ცეცხლის სიმღერის საგის ეკრანიზაცია წინა ათწლეულის ერთ-ერთი ყველაზე პოპულარული სერიალი გახლდათ, მაგრამ მისმა დასასრულმა ბევრს გაუცრუა იმედი.

"ყველას თავისი აზრი აქვს", — ამბობს ჰარინგტონი, — "ვფიქრობ, სიუჟეტის კუთხით, ბოლოსკენ შეცდომები დაუშვეს. რამდენიმე საინტერესო იდეა იყო, რომელმაც ბოლომდე ვერ გაამართლა".

სხვათა შორის, GOT-ის დასასრული სერიალში მონაწილე კიდევ ერთმა მსახიობმა, კონლეთ ჰილმაც, გააკრიტიკა. ჰილსაც იგივე არგუმენტი ჰქონდა — ბოლო სეზონი მიაფუჩეჩესო.

თავის დროზე, სერიალის დასასრულმა ფანებში ისეთი უკმაყოფილება გამოიწვია, რომ მათ პეტიციაც კი შექმნეს, HBO-ის ბოლო სეზონი თავიდან გადაეღო. ჰილის გარდა, შოუს ფინალით მაინცდამაინც კმაყოფილები არც სხვა მსახიობები არ დარჩენილან.

ფანებისა და მსახიობების უკმაყოფილების მიუხედავად, მარტინმა მაშინ განაცხადა, რომ სერიალის დასრულებამ "შვება მოჰგვარა"; მწერალს ხომ საგა ჯერ არ დაუმთავრებია — ყინულისა და ცეცხლის სიმღერის სერიის ამ დროისთვის ბოლო, მეხუთე წიგნი დრაკონებთან ცეკვა 2011 წელს გამოიცა. მას შემდეგ კი მკითხველები მეექვსე ტომს, ზამთრის ქარებს, ელოდებიან.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…