ბრიტანელი წყალში მხტომელი ტომ დეილი უთუოდ გეხსომებათ წინა ოლიმპიური თამაშებიდან. ტოკიოს ოლიმპიადაზე სპორტსმენმა თავისი პირველი ოქროს მედალი მოიპოვა, თუმცა, განსაკუთრებით პოპულარული მას შემდეგ გახდა, რაც მაყურებლის ტრიბუნაზე საქსოვი ჩხირებით გამოჩნდა. ტომის ქსოვის ვიდეო ინტერნეტში მაშინ ვირუსულად გავრცელდა, მოგვიანებით კი, სპორტსმენმა აღნიშნა, რომ ეს საქმიანობა განტვირთვასა და სტრესის მოხსნაში ეხმარება.

სწორედ ამიტომ, დეილის ყაისნაღების პარიზში წაღებაც არ დავიწყებია. წლევანდელ ოლიმპიადაზე ტომი თავისი საქსოვით სამი მეტრის ტრამპლინიდან ხტომაში ქალების კატეგორიის ფინალზე გამოჩნდა. ფოტოების გავრცელების შემდეგ, ინტერნეტმომხმარებლები დაინტერესდნენ, რას ქსოვდა სპორტსმენი ამჯერად. ტომმაც ფანები არ გააწბილა და როცა თითქმის დასრულებული ნამუშევარი თვალის შესავლებად ასწია, დავინახეთ, რომ მოქსოვილ ჯემპრზე მისი გვარი ეწერა.

@weareknitters With the Paris Olympic Games starting, we have to say that we're SO ready to see Tom Daley knitting at the Olympics! 🧶✨ #knittok #knitting #parisolympics #olympics2024 #tomdaley #tomdaleyknitting #tomdaleyolympics ♬ original sound - weareknitters

2022 წლის ინტერვიუში დეილიმ აღნიშნა, რომ ქსოვა განსაკუთრებით პანდემიის პერიოდში დაეხმარა, როცა გარეთ გასვლისა და სხვებთან ურთიერთობის შესაძლებლობა შეზღუდული ჰქონდა. შფოთვისმომგვრელი ფიქრების ასაცილებლად ტომი მაშინ თურმე სულ ქსოვდა და მალევე ეს პროცესი მისთვის "მედიტაციად" იქცა.

სხვათა შორის, სპორტსმენს თავისი ჰობისთვის ინსტაგრამგვერდიც კი აქვს შექმნილი, რომელსაც 1,2 მილიონზე მეტი გამომწერი ჰყავს. 2022 წელს დეილიმ ქსოვის სახელმძღვანელოც გამოსცა.

სპორტულ საქმიანობასა და ქსოვასთან ერთად, ტომ დეილი ლგბტქ ადამიანების აქტიური მხარდაჭერითაცაა ცნობილი. იგი თავად 2013 წელს დაქამინგაუთდა.

"საოცრად ვამაყობ, რომ ვარ გეი და ასევე ვარ ოლიმპიური ჩემპიონი", — განაცხადა დეილიმ ტოკიოს ოლიმპიადაზე ოქროს მედლის მოპოვების შემდეგ, — "როცა პატარა გახლდით, მეგონა, რომ ამას ვერასდროს მივაღწევდი — იმის გამო, ვინც ვიყავი. ახლა კი, როცა ოლიმპიური ჩემპიონი ვარ, ეს ნიშნავს, რომ ყველაფრის მიღწევა შეგიძლია.

"ვიმედოვნებ, ყველა ახალგაზრდა ლგბტქ ადამიანი დაინახავს, რომ მიუხედავად იმისა, რამდენად მარტოსულად გრძნობ ახლა თავს, მარტო არ ხარ. ყველაფრის მიღწევა შეგიძლია".

ტომ დეილიმ 2012 და 2016 წლებში ბრინჯაოს ოლიმპიური მედლებიც მოიპოვა, წლევანდელ ოლიმპიადაზე კი, 10-მეტრიანი პლატფორმიდან ხტომაში, ის და მისი მეწყვილე ვერცხლის მედლების მფლობელები გახდნენ.