დეზერტირების ბაზარი, დაგეგმილი მშენებლობის გამო, 6 თვით იკეტება. ბაზრის ტერიტორიაზე ორსართულიანი სავაჭრო ცენტრის აშენების ნებართვა უკვე გაცემულია.

BMG-ის ინფორმაციით, პროექტს შპს თბილისი მოლი განახორციელებს, რომელიც ჰოლდინგ CBS ჯგუფის შემადგენელი კომპანიაა.

ჰოლდინგის დამფუძნებელი ბიზნესმენი ხვიჩა მაქაცარიაა.

ბაზრის დახურვის და მშენებლობის დაწყების გადაწყვეტილებას მოვაჭრეების პროტესტი მოჰყვა. მათ დღეს თამარ მეფის გამზირი გადაკეტეს, მას შემდეგ კი, რაც მათ მერიის წარმომადგენელთან შეხვედრას დაჰპირდნენ, გზა გახსნეს.

მოვაჭრეების თქმით, ისინი შემოსავლის გარეშე რჩებიან, ხოლო სახელმწიფომ, მათი თქმით, საქმიანობისთვის ალტერნატიული ფართიც კი არ შესთავაზა.

დასაქმებულები თბილისის მერთან, კახა კალაძესთან შეხვედრას ითხოვენ.

"ეს არის ბოლო წვეთი, ყველა ემიგრანტი ვერ გავხდებით, ყველა სამშობლოს ვერ მივატოვებთ, აქ მოვიდეს კახი კალაძე, მოვიდეს ხვიჩა მაქაცარია, სახელმწიფომ გააკეთოს ამ ბაზრის დეცენტრალიზაცია. რაღას გვერჩით, რაღა გინდათ? რაღას გაგვწყვიტეთ წელში, რად დაგვამონეთ? რატომ უნდა ვიარო მე მშიერმა, გეკითხები, კალაძე?!" — აცხადებს ერთ-ერთი დასაქმებული.

მოთხოვნების დაუკმაყოფილებლობის შემთხვევაში, მოვაჭრეები მთავარი მაგისტრალის გადაკეტვას აანონსებენ.