დღეს, 29 ივლისს, 38-მა ოპოზიციონერმა დეპუტატმა, საკონსტიტუციო სასამართლოს, რუსული კანონის შეჩერების მოთხოვნით მიმართა.

სარჩელი, საპარლამენტო ოპოზიციის წარმომადგენლებთან ერთად, ერთიანი ნაციონალური მოძრაობის თავმჯდომარემ, თინა ბოკუჩავამ და ერთიანობა — ნაციონალური მოძრაობის ლიდერმა, თამარ კორძაიამ შეიტანეს.

"საპარლამენტო ოპოზიცია ერთიანია სამოქალაქო საზოგადოებასთან, მედიასთან, საქართველოს პრეზიდენტთან და საქართველოს თითოეულ მოქალაქესთან, იმიტომ, რომ ჩვენ ვთვლით, რომ რუსული კანონი არღვევს საქართველოს კონსტიტუციას, ძირს უთხრის საქართველოს დემოკრატიას და ვთვლით, რომ ჩვენი კონსტიტუციური ვალდებულებაა, ამაზე ვიდავოთ საკონსტიტუციო სასამართლოში. საქართველოს საპარლამენტო ოპოზიცია აბსოლუტურად ერთიანია, სარჩელს 38 დეპუტატი ვაწერთ ხელს", — განაცხადა თამარ კორძაიამ საკონსტიტუციოში სარჩელის შეტანამდე.

საპარლამენტო ოპოზიციის წევრებმა პარლამენტში საკონსტიტუციო სარჩელს ხელი 22 ივლისს მოაწერეს.

ოპოზიცია, საკონსტიტუციო სასამართლოსგან, რუსული კანონის კონსტიტუციის 22-ე და 78-ე მუხლებთან შეუსაბამობის დადასტურებასა და მის გაუქმებას ითხოვს.

გარდა ამისა, 17 ივლისს, 121-მა არასამთავრობო და მედია ორგანიზაციამ რუსული კანონი საკონსტიტუციო სასამართლოში გაასაჩივრა.

ორგანიზაციები, სარჩელთან ერთად, დროებითი ღონისძიების სახით, სასამართლოს მიერ საბოლოო გადაწყვეტილების მიღებამდე, კანონის არაკონსტიტუციური ნორმების ამოქმედების შეჩერებასაც მოითხოვენ.

განცხადების მიხედვით, არასამთავრობო და მედია ორგანიზაციები საჩივარს ადამიანის უფლებათა ევროპულ სასამართლოში წარსადგენადაც ამზადებენ.

კანონი საკონსტიტუციო სასამართლოში ასევე გაასაჩივრა პრეზიდენტმა სალომე ზურაბიშვილმა.

პრეზიდენტი ამ სარჩელით ითხოვს კანონის მოქმედების შეჩერებას და მის საბოლოო გაუქმებას.