121 ქართული არასამთავრობო და მედია ორგანიზაცია აცხადებს, რომ აგრძელებენ სამართლებრივ ბრძოლას რუსული კანონის წინააღმდეგ, რისთვისაც დღეს, 17 ივლისს, სარჩელით საკონსტიტუციო სასამართლოს მიმართავენ.

ორგანიზაციები, სარჩელთან ერთად, დროებითი ღონისძიების სახით, სასამართლოს მიერ საბოლოო გადაწყვეტილების მიღებამდე, კანონის არაკონსტიტუციური ნორმების ამოქმედების შეჩერებასაც მოითხოვენ.

"კონსტიტუციური სარჩელი კიდევ ერთხელ ნათლად ადასტურებს, რომ ეს კანონი ლახავს თითოეული ადამიანის უფლებას, გაერთიანდეს თანამოაზრეებთან ერთად საზოგადოდ სასიკეთო საქმის საკეთებლად და სხვა ადამიანების დასახმარებლად", — წერენ ორგანიზაციები.

მათივე თქმით, რუსული კანონის მიღებით, ხელისუფლება მტრულ და ღირსების შემლახავ გარემოს ქმნის, რითაც გაერთიანების, გამოხატვისა და სხვა უფლებებითა და თავისუფლებებით სარგებლობას საფრთხედ აცხადებს.

ორგანიზაციები მიესალმებიან საქართველოს პრეზიდენტისა და პარლამენტართა გადაწყვეტილებას, ასევე გაასაჩივრონ რუსული კანონი კონსტიტუციის 78-ე მუხლთან მიმართებით.

გაიგე მეტი: პრეზიდენტი რუსულ კანონს საკონსტიტუციო სასამართლოში გაასაჩივრებს

ასევე, ნახეთ: კორძაიას ცნობით, რუსულ კანონს საკონსტიტუციო სასამართლოში პარლამენტის ოპოზიციონერი წევრებიც გაასაჩივრებენ

განცხადების მიხედვით, არასამთავრობო და მედია ორგანიზაციები საჩივარს ადამიანის უფლებათა ევროპულ სასამართლოში წარსადგენადაც ამზადებენ:

"კიდევ ერთხელ ვიმეორებთ, რომ რუსული კანონის წესებით არ ვიცხოვრებთ, არ დავემორჩილებით მას, და გამოვიყენებთ ყველა შესაძლო შიდა და საერთაშორისო მექანიზმს მისი მოქმედების შესაფერხებლად კანონის უპირობო გაუქმებამდე".