საქართველოს საგარეო საქმეთა მინისტრი, მიხეილ ჯანელიძე ამბობს, რომ ამერიკის ვიცე-პრეზიდენტის ვიზიტით, ევროინტეგრაციისა და ნატოში წევრობის მიმართულებით აშშ-ს მხარდაჭერა დადასტურდა. ამის შესახებ ჯანელიძემ მთავრობის კანცელარიაში აშშ-ს ვიცე-პრეზიდენტის, მაიკ პენსისა და საქართველოს პრემიერ-მინისტრის, გიორგი კვირიკაშვილის პრესკონფერენციის დასრულების შემდეგ განაცხადა.

"ძალიან ნათლად დადასტურდა აშშ-ის მხარდაჭერა ევროინტეგრაციისა და ნატოს წევრობის მიმართულებით. ასევე ის პროგრესი, რაც ჩვენ, ჩვენს მთავრობას აშშ-ს მხარდაჭერით გვაქვს მოპოვებული. ჩვენ ვაძლიერებთ ჩვენს ეკონომიკას, თავდაცვისუნარიანობას ჩვენს ძირითად სტრატეგიულ პარტნიორთან ერთად, რაც ძირითადი განმაპირობებელია ჩვენი მშვიდობისა და რეგიონის სტაბილურობის", - განაცხადა ჯანელიძემ.

ამერიკის შეერთებული შტატების ვიცე-პრეზიდენტმა, მაიკ პენსმა, რომელიც საქართველოში ოფიციალური ვიზიტით იმყოფება, გიორგი კვირიკაშვილთან ერთად დღეს გამართულ პრესკონფერენციაზე ყურადღება გაამახვილა საქართველო-ამერიკის სტრატეგიულ პარტნიორობასა და საქართველოს კულტურის სიმდიდრეზე.