მედიის ადვოკატირების კოალიცია აცხადებს, რომ ქართული ოცნების ხელისუფლების პირობებში, დამოუკიდებელ და კრიტიკულ მედიას რთულ პირობებში უწევს მუშაობა, ხოლო სასამართლო სხდომების გაშუქების ხელშეშლა დამატებით პრობლემას უქმნის მედიას.

კოალიცია ამ განცხადებით გამოეხმაურა ტელეკომპანია პირველის საინფორმაციო სამსახურის უფროსის, ნოდარ მელაძის მიერ გავრცელებულ ინფორმაციას, რომლის მიხედვით, ტელევიზიის განცხადებებს სასამართლო სხდომების გაშუქებასთან დაკავშირებით, სასამართლო სისტემა არ იღებს და მედიის წარმომადგენლებს სხდომებზე არც მოსამართლე უშვებს.

"მედიის როლი დემოკრატიულ საზოგადოებაში გულისხმობს ქვეყანაში მიმდინარე აქტუალურ საკითხებზე საზოგადოების ინფორმირებას, მათ შორის, ჟურნალისტების სასამართლო სხდომებზე დასწრებასა და პროცესის გაშუქებას. მნიშვნელოვანია, რომ სასამართლო ხელისუფლების პასუხისმგებლებმა პირებმა უზრუნველყონ მედიების სხდომებზე დასწრება და განმარტონ პრობლემების გამომწვევი მიზეზები", — წერს კოალიცია.