საქართველოს სახალხო დამცველის, ლევან იოსელიანის განცხადებით, შპს ფსიქიკური ჯანმრთელობის და ნარკომანიის პრევენციის ცენტრში, თერაპიული, ინფრასტრუქტურული და სანიტარულ-ჰიგიენური მდგომარეობა, არ შეესაბამება ეროვნულ თუ საერთაშორისო სტანდარტებს და შეუძლებელს ხდის პაციენტთა მკურნალობას მათი ღირსების დაცვის პირობებში.

იოსელიანის თქმით, რომელმაც ცენტრი 5 ივლისს მოინახულა, "უკიდურესად გადატვირთული" პალატები არ იძლევა პირადი სივრცის დაცვის შესაძლებლობას, პალატები სარემონტოა, სველი წერტილები კი — ამორტიზებული, გაუმართავი და არასაკმარისი. (2-3 სველი წერტილი 60-მდე პირზე).

"პაციენტებს არ მიეწოდებათ მათთვის საჭირო ყველა ჰიგიენური საშუალება. სასადილო სივრცე მცირეა, რაც პაციენტებს ერთად კვების შესაძლებლობას არ აძლევს", — აცხადებს იოსელიანი.

ასევე, დაწესებულებაში გამოყოფილია სივრცე ფსიქო-სოციალური რეაბილიტაციისთვის, რომელიც უზრუნველყოფილია კომპიუტერული ტექნიკით და შესაბამისი რესურსებით სხვადასხვა სარეაბილიტაციო აქტივობისთვის, თუმცა, სახალხო დამცველის შეფასებით, სივრცეც და რესურსებიც არასაკმარისია და ვერ უზრუნველყოფს სარეაბილიტაციო აქტივობებში შესაბამისი საჭიროების მქონე ყველა პაციენტის ჩართვას:

"მწვავედ გამოიკვეთა პაციენტთა უსაფრთხოების პრობლემა. რამდენიმე დღის წინ, ერთი პაციენტი ფანჯრიდან გადახტა. საბედნიეროდ, შემთხვევას ლეტალური შედეგი არ მოჰყოლია. ასევე, ადამიანური და ფინანსური რესურსების ნაკლებობაა, რაც სასწრაფო მოგვარებას საჭიროებს".

სახალხო დამცველი მოუწოდებს პასუხისმგებელ სახელმწიფო უწყებებს, გააძლიერონ ღონისძიებები ფსიქიკური ჯანმრთელობის სფეროში წლების განმავლობაში მოუგვარებელი სისტემური პრობლემების აღმოფხვრისა და ადამიანის უფლებების დაცვის სათანადო სტანდარტის უზრუნველყოფისთვის.