აზერბაიჯანისთვის სახელმწიფო და სამხედრო საიდუმლოების გაცემის ბრალდებით, სომეხი კონტრაქტორი ჯარისკაცი დააკავეს.

სომხეთის საგამოძიებო კომიტეტმა 43 წლის კონტრაქტორის წინააღმდეგ წაყენებული ბრალდების შესახებ გუშინ განაცხადა.

ჯარისკაცს ბრალად ედება ფარულ აზერბაიჯანელ აგენტთან კომუნიკაცია — არსებული ინფორმაციით, აგენტმა სომეხი ჯარისკაცი "რომანტიკულ საუბრებში" ჩააბა.

საგამოძიებო კომიტეტმა განაცხადა, რომ ჯარისკაცმა 2023 წლის იანვრიდან 2024 წლის თებერვლამდე "შეაგროვა და გადასცა სახელმწიფო სამსახურის საიდუმლოებები, ასევე, სამხედრო ინფორმაცია მათი დანაყოფის დაცვის ქვეშ მყოფი საბრძოლო პოზიციის იარაღთან დაკავშირებით“.

"ამ ქმედებებმა ზიანი მიაყენა სომხეთის რესპუბლიკის სუვერენიტეტს, ტერიტორიულ მთლიანობას და საგარეო უსაფრთხოებას“, — ნათქვამია განცხადებაში.

ბრალის დამტკიცების შემთხვევაში, ჯარისკაცს 20 წლამდე, ან უვადო თავისუფლების აღკვეთა ემუქრება.

ეს არის სამხედრო პირის მსგავსი ბოლო საქმე ათეულობით საქმის შორის, რომლის ფარგლებშიც, ათობით ჯარისკაცს, 2020 წლის მეორე ყარაბაღის ომის შემდგომ წლებში, ჯაშუშობაში წაუყენეს ბრალი.

2022 წლის სექტემბერში, მაშინდელმა გენერალურმა პროკურორმა, არტურ დავტიანმა წარადგინა საკონსტიტუციო და საკანონმდებლო ცვლილებები, რომლებიც ღალატისთვის სიკვდილით დასჯას ითვალისწინებდა.

მისი თქმით, 2020 წლის ომის დროს და მის შემდეგ, რამდენიმე ღალატის ბრალდების შესწავლის შემდეგ, პრიორიტეტად მიიჩნია "ამ ტიპის დანაშაულის წინააღმდეგ სისხლისსამართლებრივი და სამართლებრივი ბრძოლის გაძლიერება და სადამსჯელო პოლიტიკის გამკაცრება“.

მაისის მდგომარეობით, სივილნეტი იტყობინება, რომ სამშობლოს ღალატში ბრალდებულთა მიმართ 30-ზე მეტი სისხლის სამართლის საქმეა აღძრული. მათგან ჩვიდმეტს საბრალდებო დასკვნა მოჰყვა, სასამართლოში 25-ზე მეტი პირის საქმეზე მიმდინარეობდა პროცესები, მათგან, ამ დრომდე სამი, დამნაშავედ ცნეს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.