საქართველოს პრემიერ-მინისტრი ირაკლი კობახიძე სომხეთის რესპუბლიკის საგარეო საქმეთა მინისტრს, არარატ მირზოიანს შეხვდა.

ინფორმაციას მთავრობის პრესსამსახური ავრცელებს.

მათი ცნობით, შეხვედრაზე ყურადღება დაეთმო ორ ქვეყანას შორის სტრატეგიული პარტნიორობის დამყარების შესახებ ერთობლივი დეკლარაციით განსაზღვრული თანამშრომლობის მიმართულებებს.

ასევე, საუბარი შეეხო სავაჭრო-ეკონომიკური კავშირების შემდგომი გაღრმავების კუთხით არსებული პოტენციალის ათვისების მნიშვნელობას.

განიხილეს რეგიონში არსებული ვითარება და უსაფრთხოების გამოწვევები. ხაზი გაესვა მშვიდობისა და სტაბილურობის მნიშვნელობას.

კობახიძემ თქვა, რომ საქართველო მზად არის, წვლილი შეიტანოს რეგიონში კონსტრუქციული დიალოგის წარმართვაში, უსაფრთხო და სტაბილური გარემოს ხელშესაწყობად.

შეხვედრაზე ისაუბრეს ტურიზმზე, კულტურისა და განათლების სფეროებში არსებულ თანამშრომლობასა და სამომავლო პერსპექტივებზე.