პრემიერ-მინისტრი ირაკლი კობახიძე, თბილისის მერი კახა კალაძე და ბიძინა ივანიშვილის შვილი, ცოტნე ივანიშვილი, კიოლნში, სადაც გუშინ საქართველოს ნაკრები ესპანეთს დაუპირისპირდა, UFC-ს ყოფილ ჩემპიონს, დაღესტნელ ხაბიბ ნურმაგომედოვს შეხვდნენ.

ფოტო გუშინ კახა კალაძემ გაავრცელა.

კახა კალაძე, ხაბიბ ნურმაგომედოვი და ცოტნე ივანიშვილი

კახა კალაძე, ხაბიბ ნურმაგომედოვი და ცოტნე ივანიშვილი

ფოტო: კახა კალაძის ინსტაგრამის სთორი

კალაძესთან, ირაკლი კობახიძესთან და ცოტნე ივანიშვილთან შეხვედრის ამსახველი ფოტო თავად სპორტსმენმაც გაავრცელა, თუმცა მოგვიანებით — წაშალა.

ნურმაგომედოვი ესწრებოდა საქართველო-ესპანეთის საფეხბურთო ნაკრებების დაპირისპირებასაც.

ქართული მედია ვარაუდობს, რომ საქმე, შესაძლოა, სპორტსმენისთვის საქართველოს მოქალაქეობის მინიჭებას ეხებოდეს. ჟურნალისტების კითხვას, რა იყო შეხვედრის მიზეზი, მთავრობის ადმინისტრაციაში პასუხობენ, რომ მოქალაქეობის მინიჭება პრემიერის კომპეტენცია არ არის, თუმცა არ უთქვამთ, რომ ეს საკითხი საერთოდ არ ყოფილა განხილვის საგანი.

რუსულმა საინფორმაციო ტელეგრამ არხმა MASH დღეს გაავრცელა ინფორმაცია, რომ ნურმაგომედოვის ანგარიშები დააყადაღეს, რადგან მას საგადასახადო სამსახურის მიმართ 297 მლნ რუბლის დავალიანება აქვს.