ზაფხულის არდადეგების დადგომასთან ერთად მშობლებს ახალი საზრუნავი უჩნდებათ - რომელი წიგნები შეურჩიონ ბავშვებს წასაკითხად. წიგნების სიყვარული ბავშვებში ძალდატანების გარეშე უნდა გაჩნდეს, შესაბამისად, მნიშვნელოვანია, რომ მშობელმა ისეთი წიგნები შეარჩიოს, რომლებიც თავის მობეზრდების ნაცვლად, ბავშვს ახალი სამყაროს კარს გაუხსნის და მის ემოციურ განვითარებას შეუწყობს ხელს.

სტივენ დეივისის ჰილდა და უჩინმაჩნები ცისფერთმიანი გოგოს თავგადასავლებს გვიყვება, რომელიც დედასთან ერთად ჯადოსნურ და ლამაზ ხეობაში ცხოვრობს. გარდა იმისა, რომ ჰილდას ისტორია დაუჯერებელი თავგადასავლებითა და სიკეთით სავსეა, წიგნი სიერა მილერის ულამაზესი ილუსტრაციებითაა გაფორმებული, რაც ბავშვისთვის წიგნის კითხვას კიდევ უფრო საინტერესოს გახდის.

მოგზაურობას და თავგადასავალს ჰილდა ძალიან სერიოზულად ეკიდება. მისი საუკეთესო მეგობარი, ტვიგი - სიმამაცისა და საყვარლობის პატარა ბუნდღაა, რომელიც ჰილდას მოგზაურობაში ხშირად თან ახლავს. წიგნის კითხვისას ბავშვები რეკომენდაციებსაც გაეცნობიან, რომლებიც აუცილებლად უნდა გაითვალისწინონ იმ შემთხვევაში, თუკი მღვიმეების დალაშქვრას აპირებენ, სადაც არასტუმართმოყვარე ბინადრები, ტროლები ცხოვრობენ. ჰილდას სახლში ჯანჯაფილის, მუსკატის, კაკლისა და კლიავის ღვთაებრივი სურნელი დგას, ცისფერთმიანი ჰილდა ძილის წინ კი ცხელ შოკოლადს სვამს და აგიზგიზებული ბუხრის წინ ზის, სადაც დედასთან ერთად სამაგიდო თამაშებს თამაშობს.

ჰილდა და უჩინმაჩინების კითხვისას ბავშვები თანაგრძნობის მნიშვნელობაზე დაფიქრდებიან და მიხვდებიან, რომ ამ ქაოსურ სამყაროში ადგილი ყველასთვის მოიძებნება. "ამ ხეობაში მცხოვრებ სხვადასხვა ჯადოსნურ არსებას ჩვენც უცნაურებად ვეჩვენებით" - ეუბნება ჰილდას დედა და ასწავლის, რომ მიუხედავად განსხვავებებისა, ერთმანეთის სიყვარული და თანაცხოვრება მაინც შესაძლებელია.

დედა ჰილდას ხშირად უმეორებს, რომ ყველაზე მნიშვნელოვანი სიკეთეა და ალბათ ამიტომაცაა, რომ ჰილდა ყველასთან სიკეთითა და სიყვარულით სავსე ურთიერთობის ფორმას ირჩევს, მაშინაც კი, როცა მისი სახლის დანგრევას ცდილობენ და ელფების პრემიერ-მინისტრის ადგილსამყოფელს არაფრის ნებით ეუბნებიან!

ჰილდა თავგადასავლის პროცესში რამდენიმე გაკვეთილს სწავლობს. იღებს პრაქტიკულ რჩევებსაც და გამბედაობისა და უნარიანობის გამოცდებსაც აბარებს. პირველად ივიწყებს საკუთარ პრობლემებს და ხედავს სხვისას. ახელს თვალებს და იაზრებს, რომ ჭეშმარიტების დასანახად საჭიროა, შენი კომფორტის ზონიდან გახვიდე და შეძლო, სხვისი თვალითაც შეავლო სამყაროს თვალი.

თუ გსურთ, თქვენი ბავშვები ჰილდასთან ერთად ჯადოსნურ თავგადასავლებში გადაეშვან, წიგნის შეძენას ბიბლუსის ყველა ფილიალში და პალიტრა L-ის გვერდზე (palitral.ge) შეძლებთ.