27 ივლისის ფრენა იღბლიანი აღმოჩნდა ავიაკომპანია ატლასგლობალის თვითმფრინავისთვის, რომელიც რეისს სტამბოლის ათათურქის სახელობის აეროპორტიდან კვიპროსის ქალაქ ერკანისკენს ასრულებდა.

ფოტო: twitter.com / AirCrashMayday

ატლასგლობალის დაზიანებული თვითმფრინავი

ფოტო: twitter.com / AirCrashMayday

ბორტზე ეკიპაჟის ექვსი წევრი და 121 მგზავრი იმყოფებოდა, რა დროსაც, აფრენიდან მალევე, თვითმფრინავი ძლიერ შტორმში მოყვა. სეტყვამ იმდენად დააზიანა პილოტების კაბინის შუშები და თავად თვითმფრინავის კორპუსი, რომ პილოტებმა სასწაულებრივად შეძლეს აეროპორტში დაბრუნება და ლაინერის უსაფრთხოდ დასმა.

ფოტო: Flightradar24

ფოტო: twitter.com / AirCrashMayday

Airbus a320-ის უკრაინელმა კაპიტანმა ალექსანდრ აკოპოვმა განცხადება გაავრცელა, რომლის მიხედვითაც, თვითმფრინავი დაახლოებით 1 200 მეტრის სიმაღლეზე იმყოფებოდა, რა დროსაც შტორმში მოჰყვა.

პილოტების სიმამაცესა და პროფესიონალიზმზე გაამახვილა ყურადღება ავიაკომპანია ატლასგლობალმა:

"შუშების დაზიანების გამო, ჩვენმა პილოტებმა ათათურქის აეროპორტში დაბრუნება გადაწყვიტეს. მათი პროფესიონალიზმისა და გამოცდილების წყალობით, თვითმფრინავი აეროპორტში უსაფრთხოდ დაეშვა. 121 მგზავრი და ეკიპაჟის ექვსი წევრი კი ერკანის აეროპორტში სხვა თვითმფრინავით გავგზავნეთ".

თვითმფრინავის ავარიული დაშვება ათათურქის აეროპორტში არაერთმა კამერამ გადაიღო, რადგან აეროპორტში ინფორმირებულნი იყვნენ პრობლემის შესახებ. არსებობდა მოლოდინი, რომ დაშვება უსაფრთხო არ იქნებოდა. ერთ-ერთმა მგზავრმა, ინციდენტისას სალონში გადაიღო ვიდეოზე, რომელზეც აღბეჭდილია იქ არსებული პანიკური სიტუაცია. საბოლოოდ, ყველაფერი მშვიდობით დასრულდა.

ატლასგლობალი არ ყოფილა ერთადერთი ავიაკომპანია, რომლის თვითმფრინავიც დაზიანდა. სეტყვამ ასევე დააზიანა თურქეთის ავიახაზებისა და პეგასუსის ორი ლაინერი, თუმცა ინციდენტი სერიოზული არ ყოფილა.

თურქეთის ავიახაზების დაზიანებული თვითმფრინავი

ფოტო: twitter.com / AirCrashMayday

პეგასუსის დაზიანებული თვითმფრინავი

ფოტო: twitter.com / AirCrashMayday