რას შეიძლება ასახავდეს ორად გაჭრილი უზარმაზარი ლიმონი, რომლის კიდეზეც გადასახტომად მომზადებული მოცურავე ქალი დგას და რომლის ქვეშაც, ვინტაჟურ ავტომობილთან, უზარმაზარი წინწკლებიანი სოკოებია ამოსული, ან აბსტრაქტული ორნამენტებით გარშემორტყმული, ფეხმორთხმით მჯდომი, წითურთმიანი ფიგურა, ან თვალებდახუჭული ყვითელი სახე, მწვანე წვერით და მესამე, გახელილი თვალით შუბლზე? რა შეიძლება აერთიანებდეს ამ სამ გამოსახულებას და რაზეა დატანილი ისინი? სავარაუდოდ, ჩვენს შორის არ მოიძებნება ადამიანი, რომელიც დაუშვებდა, რომ ეს „არაჩვეულებრივი“ გამოფენა გალერეაში კი არა, ლუდის ქილებზე მიმდინარეობს და მის ფარგლებში, ეროვნული ლუდის ბრენდის, „არგოს“ ინიციატივით 11 ქართველი არტისტი გაერთიანდა.

მალე ეს „არაჩვეულებრივი გამოფენა“ მოედება ქუჩებს, სახლებს, კაფეებს, აივნებს, მინდვრებს, სკვერებს... მაგიდებზე, დახლებზე, თქვენს ხელებში, თქვენს თვალებთან და ტუჩებთან ძალიან ახლოს, გამოიფინება 15 განსხვავებული ემოციის ილუსტრაცია. შეგვიძლია ჩავთვალოთ, რომ ეს იქნება ყველაზე სასარგებლო და სახალისო ვირუსი დედამიწაზე, რომელიც ჩვენმა მეგობარმა ბრენდმა გვისახსოვრა. უთხარით ყველას, რომ ვირუსს აქვს ერთადერთი სიმპტომი – იწვევს ღიმილს და გადადის მხოლოდ ბოთლის ბოთლზე მიჭახუნების გზით.

ახალი, ლიმიტირებული კოლექციის ეტიკეტებზე წამყვანმა ქართველმა არტისტებმა, სავარაუდოდ, საკუთარი დამოკიდებულება ასახეს, ზოგადად, ლუდისადმი და იმ შერგძნებებისადმი, რომლებსაც ეს სასმელი ან მისი სმის პროცესი იწვევს. თუმცა, ასე დარწმუნებით ვერ ვიტყვით, რადგან, პრინციპში, თითოეული მათგანი დამოუკიდებელი ხელოვნების ნიმუშია და ინტერპრეტაციებისათვის საკმაოდ დიდ სივრცეს ტოვებს. ეტიკეტები და მათზე მიმოფანტული სიმბოლოები თუ მინიშნებები ათასგვარ შეგრძნებას იწვევს: ხან მუსიკა ისმის, ხან მეგობრების მხიარული შეძახილები, ხან ფერები მძლავრობს, ხან ადრენალინი, ხან იდეალური სიჩუმეა, ფიქრისათვის...

გარდა იმისა, რომ „არგო“ ამ ფორმით ქართველი არტისტებისადმი მხარდაჭერას და ინტერესს გამოხატავს, მას ქართული ლუდის წარმოება ახალ საფეხურზე გადაჰყავს. მიჰყვება თანამედროვეობას, ხშირად იცვლის ფორმას, ცდილობს, შესთავაზოს რაიმე საინტერესო ნებისმიერი ინტერესების მქონე ადამიანს და ამით კიდევ უფრო დასამახსოვრებელ გამოცდილებად აქცევს ლუდის სმის რიტუალს.