მოკლედ: 19 ივნისს, 19:00 საათზე, თბილისის საკრებულოს შენობასთან გაიმართება აქცია სახელწოდებით — იპოდრომზე მშენებლობას არ დავუშვებთ!

  • აქციის ორგანიზატორია სამოქალაქო მოძრაობა იპოდრომი — უბეტონო მხარე.

დეტალები: აქციის ორგანიზატორების თქმით, თბილისის საკრებულომ "უჩუმრად და მოქალაქეთა ინტერესების სრული უგულებელყოფით" იპოდრომის ტყეს სარეკრეაციო ზონის სტატუსი მოუხსნა: "ამით თბილისში შემორჩენილი ერთადერთი გამწვანებული სივრცის დაბეტონებას საბოლოოდ აუნთო მწვანე შუქი".

  • ორგანიზატორები საკრებულოსგან მოითხოვენ, გასცენ პასუხი თუ რა მიზეზით შეუცვალეს ტყეს სარეკრეაციო ზონის სტატუსი: "მოვითხოვთ, დაუყოვნებლივ შეცვალონ ეს უღირსი და მერკანტილური გადაწყვეტილება".
  • მათივე თქმით, იპოდრომზე მშენებლობა დაასამარებს ისტორიულ ადგილს, მის ეკოლოგიურ და სოციალურ მნიშვნელობას და გამოიწვევს სატრანსპორტო კოლაფსს.
  • "ის, რაც სახელმწიფომ ყოფილ იპოდრომს დამართა, არის იმის სრული დემონსტრირება, რომ არაფერს აქვს აზრი, ოდიოზური მმართველების ბიზნეს ინტერესების გარდა", — წერენ ორგანიზატორები.

კონტექსტი: თბილისის საკრებულომ 14 ივნისს, იპოდრომის ტყეში, თამარაშვილის ქუჩა N13-თან ცათამბჯენების მშენებლობისთვის განაშენიანების რეგულირების გეგმის გეგმარებითი დავალების პროექტს მხარი დაუჭირა.

  • მრავალფუნქციური და მრავალბინიანი საცხოვრებელი კომპლექსის აშენებას ცენტრალ პარკ ავენიუ გეგმავს.
  • იპოდრომის მოედნის გვერდით მდებარე ტყეში 7 შენობა აშენდება, მათგან ყველაზე დაბალი 21-სართულიანი, ყველაზე მაღალი კი 79-სართულიანი იქნება.
  • ცენტრალ პარკ ავენიუს დირექტორი ვასილ ფხაკაძეა — ბიზნესმენ ლევან ფხაკაძის შვილი და ვისოლ ჯგუფის დამფუძნებლის, სოსო ფხაკაძის ძმისშვილი.