მოკლედ: სპეციალური საგამოძიებო სამსახურის ხელახალი გამოძიებით და ადამიანის უფლებათა ევროპული სასამართლოს გადაწყვეტილებით, პოლიციის ადმინისტრაციულ შენობაში, მოქალაქე ვლადიმერ მჭედლიშვილის მიმართ ჩადენილი არასათანადო მოპყრობის ფაქტზე, დააკავეს სიღნაღის რაიონული სამმართველოს ინსპექტორ-გამომძიებელი.

  • დანაშაული 5 დან 8 წლამდე პატიმრობას ითვალისწინებს.
  • ინფორმაციას საქართველოს პროკურატურა ავრცელებს.

რა მოხდა: გამოძიებით დადგინდა, რომ 2017 წლის 15 მაისს, ქალაქ სიღნაღში, ქორწინების სახლის მიმდებარე ტერიტორიაზე, დაზარალებული ვლადიმერ მჭედლიშვილი თანმხლებ პირებთან ერთად ალკოჰოლურ სასმელს სვამდა. ამ დროს მასთან მივიდნენ სიღნაღის რაიონული სამმართველოს თანამშრომლები.

  • ერთ-ერთმა პოლიციელმა მოუწოდა, შეეწყვიტა საჯარო სივრცეში ალკოჰოლური სასმლის დალევა, რასაც მოჰყვა მათ შორის შელაპარაკება.
  • პოლიციის თანამშრომლებმა მჭედლიშვილი დააკავეს ადმინისტრაციული წესით და გადაიყვანეს სიღნაღის პოლიციის სამმართველოს ადმინისტრაციულ შენობაში, სადაც ინსპექტორ-გამომძიებელი, რამდენიმე წუთის განმავლობაში, დაკავებულს მუშტებს და ფეხებს გვერდების და თავის არეში ურტყამდა და სიტყვიერ შეურაცხყოფას აყენებდა.
  • ძალადობის შედეგად დაკავებულს დაუდგინდა ნეკნების მოტეხილობა და სხვა მრავლობითი დაზიანებები მიიღო.

მომხდარ ფაქტზე გამოძიება 2017 წელს დაიწყო. დაზარალებულმა საკუთარი უფლებების დასაცავად სტრასბურგის სასამართლოს მიმართა, რომელმაც საქმეზე გადაწყვეტილება 2023 წლის 14 დეკემბერს მიიღო და დაზარალებულ მჭედლიშვილის მიმართ წამების/არაადამიანური მოპყრობის აკრძალვაზე დარღვევა დაადგინა.

  • ამ გადაწყვეტილების შემდეგ საქართველოს ხელახალი გამოძიების ჩატარების ვალდებულება გაუჩნდა.

სპეციალურმა საგამოძიებო სამსახურმა საქმე 2024 წელს გადმოიბარა. ხელახლა ნაწარმოები გამოძიების და მოპოვებული მტკიცებულებების შედეგად, დააკავეს ინსპექტორ-გამომძიებელი, რომელმაც პოლიციის რიგები 2021 წელს დატოვა.