ანტისამთავრობო ჯგუფის "ტავუში სამშობლოსთვის" წევრებმა სომხეთის საგამოძიებო კომიტეტის მიმართულებით მსვლელობა გამართეს. მათ მოითხოვეს 27 დაკავებულის გათავისუფლება და პოლიციის თანამშრომლების პასუხისგებაში მიცემა, მომიტინგეების მიმართ ძალადობისთვის.

მათი მოთხოვნა იყო, ასევე, კომიტეტის წარმომადგენელთან შეხვედრა, თუმცა მათ მოუწოდეს, რომ შეხვედრის შესახებ განცხადება შენობის დაცვის მეშვეობით შეეტანათ.

ისინი მოითხოვდნენ დაკავებული 27 მომიტინგის გათავისუფლებას და ასევე, გამოძიებას საპროტესტო აქციებზე პოლიციის ძალადობის ფაქტების შესახებ.

"მოვითხოვთ საგამოძიებო კომიტეტს, დაიწყოს პროცესი ყველა იმ ხულიგნის წინააღმდეგ, ვინც სცემეს და სცემდა 10, 20 და 7-კაციან ჯგუფებს“, — განაცხადა მოძრაობის ლიდერმა, მთავარეპისკოპოსმა ბაგრატ გალსტანიანმა.

მისი თქმით, სამართალდამცავმა უწყებებმა მოქალაქეები უნდა დაიცვან და არა — შეაშინონ.

დემონსტრაციის დროს, მომიტინგეებს, საგამოძიებო კომიტეტის მიმდებარედ, ეჭირათ ჯაჭვები და სარკეები, რათა პოლიციელები "შეერცხვინათ" მომიტინგეების დარბევის გამო.

სომხეთის საგამოძიებო კომიტეტმა განაცხადა, რომ მომიტინგეებმა ძალა გამოიყენეს პოლიციელების მიმართ, რათა გადაელახათ ბარიკადები და შესულიყვნენ საგარეო საქმეთა სამინისტროში. აქციის მონაწილეთა ნაწილმა სხვა მომიტინგეებს შენობის დაკავებისკენ მოუწოდა.

ხელისუფლების თქმით, მანიფესტანტებთან ერთად, დაშავდა შვიდი პოლიციელიც. მოძრაობამ, საპასუხოდ, გაავრცელა ფოტოები მათი მხარდამჭერების მიერ მიყენებული დაზიანებების შესახებ.

მოძრაობამ "ტავუში სამშობლოსთვის“ გასულ თვეში პირობა დადო, რომ ჩაატარებდა სამოქალაქო დაუმორჩილებლობის აქტებს, მათი ფოკუსი გადავიდა სომხეთის ჩრდილო-აღმოსავლეთში საზღვრის დელიმიტაციის პროცესის პროტესტიდან, მთავრობის გადადგომისკენ მოწოდებაზე.

ისინი ახორციელებენ სამოქალაქო დაუმორჩილებლობის აქტებს მას შემდეგ, რაც მომიტინგეების მიმართ პოლიციის ძალადობის შესახებ გავრცელებული ინფორმაციის ფონზე, ერთ ოპოზიციურ დეპუტატს, სომხეთის ალიანსის წევრს, აშოტ სიმონიანს სპეცრაზმი დაესხა თავს.

ორშაბათს რადიო თავისუფლებამ გაავრცელა ინფორმაცია, რომ გენერალურმა პროკურატურამ სიმონიანზე თავდასხმის ფაქტზე გამოძიება დაიწყო.

საპროტესტო აქციაზე გალსტანიანმა განაცხადა, რომ ფაშინიანს "სისხლის ხილვა სურს, მის გულს ეს უნდა".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.