რა ხდება: ამერიკის შეერთებული შტატების ვიცე-პრეზიდენტმა, კამალა ჰარისმა საქართველოს პრეზიდენტს, სალომე ზურაბიშვილს წერილი მისწერა, სადაც აღნიშნულია, რომ რუსულმა კანონმა ორ ქვეყანას შორის ურთიერთობას, შესაძლოა, ძირი გამოუთხაროს.

დეტალები: "პრეზიდენტი ბაიდენი და მე დიდი შეშფოთებით ვადევნებთ თვალს საქართველოში განვითარებულ მოვლენებს", — წერია წერილში.

ჰარისის თქმით, აშშ-ის უმაღლესი პირები მიესალმებიან სალომე ზურაბიშვილის მიერ კანონზე ვეტოს დადებას და იმას, რომ საქართველოს პრეზიდენტი "ერთგულად იცავს სამოქალაქო საზოგადოებას, რომელიც საქართველოში საფრთხის ქვეშ არის."

ამერიკის ვიცე-პრეზიდენტი წერილში აღნიშნავს, რომ 30 წელზე მეტია, მხარს უჭერს საქართველოს დემოკრატიასა და ევროატლანტიკურ მისწრაფებებს.

  • "ჩვენი პარტნიორობა ეფუძნება საერთო ღირებულებებს, საერთო ინტერესებსა და ურთიერთპატივისცემას. ჩვენ მხარდამხარ ვიბრძოდით ავღანეთში და შეერთებული შტატები არის საქართველოსთვის საგარეო დახმარების ყველაზე დიდი მიმწოდებელი, რათა ხელი შეუწყოს კრიტიკული ინფრასტრუქტურის აშენებას, დემოკრატიული ინსტიტუტების გაძლიერებასა და თქვენი სამხედრო ძალების მოდერნიზებას", — წერს კამალა ჰარისი.

ვიცე-პრეზიდენტი საუბრობს ქართველი ხალხის პროტესტზეც რუსული კანონის წინააღმდეგ. მისი თქმით, საზოგადოება ნათლად აცხადებს, რომ სურს მომავალი ევროკავშირსა და ნატოში.

  • "ჩვენ ვაფასებთ თქვენს ლიდერობასა და ძალისხმევას, დაიცვათ სამოქალაქო საზოგადოება საქართველოში. თქვენს ძალისხმევას კვლავ ექნება არსებითი მნიშვნელობა, რადგან ქართველ ხალხს თქვენი იმედი აქვს, რომ დაიცავთ დემოკრატიასა და საქართველოს ევროატლანტიკურ მომავალს. შეერთებული შტატები თქვენი და ყველა ქართველის გვერდით დგას, უკეთესი მომავლისკენ სწრაფვაში", — წერს კამალა ჰარისი სალომე ზურაბიშვილს.

ფოტო: აშშ-ის საელჩო

ბოლო ხაზი: წერილი 24 მაისით თარიღდება, თუმცა აშშ-ის საელჩომ საქართველოში ის დღეს გაასაჯაროვა.