რა ხდება: ქართული ოცნება აშშ-ის სახელმწიფო მდივნის, ენტონი ბლინკენის განცხადებას ეხმაურება, სანქციების შესახებ.

  • მმართველი პარტია აცხადებს, რომ ეს არის "ანტიქართული რიტორიკის გაგრძელება, რომელსაც 2012 წლიდან ვისმენთ და რომელიც განსაკუთრებით 2021-22 წლებში გააქტიურდა".

დეტალები: "ენტონი ბლინკენის სახელით გაკეთებული განცხადება და სავიზო შეზღუდვებით შანტაჟი სხვა არაფერია, თუ არა საქართველოს დამოუკიდებლობისა და სუვერენიტეტის შეზღუდვის უხეში მცდელობა", — წერია განცხადებაში.

  • ოცნება მიიჩნევს, რომ სანქციებით მხოლოდ იმის გამო ემუქრებიან, რომ გამჭვირვალობის კანონს მისცეს ხმა, რაც "უპრეცედენტო მოვლენაა მსოფლიო პოლიტიკის ისტორიაში".
  • იმ ფაქტს კი, რომ სანქციები ოჯახის წევრებზეც გავრცელდება, ოცნება ფაშისტურ-ბოლშევიკურ მოვლენას უწოდებს.

მმართველი ძალა ამჯერადაც ახსენებს ევროკომისარ ოლივერ ვარჰეის განცხადებას სლოვაკეთის პრემიერ-მინისტრთან დაკავშირებით და მომხდარს კვლავ მუქარად აფასებს:

  • "მას შემდეგ, რაც შესაბამისმა ძალებმა საქართველოს პრემიერ-მინისტრთან საუბარში ერთ-ერთი ევროკომისრის პირით სლოვაკეთის პრეზიდენტზე ტერორისტული თავდასხმა მაგალითად მოიყვანეს და ამით, საქართველოს ხელისუფლების უმაღლესი თანამდებობის პირები სიცოცხლის მოსპობით დააშანტაჟეს, სავიზო შეზღუდვის დაწესებაზე საუბარი აღარც მოულოდნელია და აღარც გასაკვირი", — წერია განცხადებაში.

ამ თემაზე: "ხომ ნახეთ, ფიცოს რა დაემართა" — კობახიძე აცხადებს, რომ მას ერთ-ერთი ევროკომისარი დაემუქრა და ამას "გლობალური ომის პარტიას" უკავშირებს

ასევე: ევროკომისარი ვარჰეი ამბობს, რომ კობახიძეს ტელეფონით ის ესაუბრა, თუმცა მუქარის შესახებ პრემიერის განცხადება კონტექსტიდან ამოგლეჯილი და არასწორია

ქართული ოცნება მიიჩნევს, რომ სავიზო შეზღუდვა ასეთივე დაუსაბუთებელი იყო ქართველი მოსამართლეებისთვის დაწესების დროს. პარტიის მტკიცებით, ქართული სასამართლო სისტემა გამართულად ფუნქციონირებს და "ამ გადაწყვეტილებამ ქართული სასამართლოს დამოუკიდებლობაზე ვერავითარი გავლენა ვერ მოახდინა".

  • "დასასრულს, კიდევ ერთხელ მკაფიოდ გვინდა აღვნიშნოთ, რომ არ ვაპირებთ ჩვენი ქვეყნის სუვერენიტეტითა და უსაფრთხოებით ვაჭრობას. ვერავითარი შანტაჟი ვერ გვაიძულებს ჩვენი ქვეყნის საწინააღმდეგო ნაბიჯი გადავდგათ. ასეთ ვითარებაში, სანქციები მხოლოდ კონტრპროდუქტიულია და თავად სანქციის დამწესებელს აზიანებს. შესაბამისად, მოვუწოდებთ ყველას, იმოქმედონ პრაგმატულად და გადადგან ქმედითი ნაბიჯები ურთიერთობების გაჯანსაღებისთვის, რაც თანაბრად შედის როგორც ქართველი, ისე ამერიკელი ხალხის ინტერესებში", — წერია ქართული ოცნების განცხადებაში.

გაიგე მეტი: აშშ საქართველოს ხელისუფლებას და მათ ოჯახის წევრებს სავიზო შეზღუდვებს უწესებს — რა თქვა ენტონი ბლინკენმა