რა ხდება: სამეზობლო პოლიტიკისა და გაფართოების საკითხებში უნგრელი ევროკომისარი ოლივერ ვარჰეი განცხადებას ავრცელებს, სადაც ადასტურებს, რომ ირაკლი კობახიძესთან სატელეფონო საუბარი ჰქონდა.

• თუმცა, ევროპელი მაღალჩინოსანი ხაზგასმით აღნიშნავს, რომ მისი ნათქვამი, სლოვაკეთის პრემიერ-მინისტრთან დაკავშირებით, კობახიძემ საზოგადოებას კონტექსტიდან ამოგლეჯილად მიაწოდა, რამაც შინაარსი მთლიანად შეცვალა.

რას წერს ოლივერ ვარჰეი: "საქართველოს პრემიერ-მინისტრის 2024 წლის 23 მაისს გაკეთებულ განცხადებაზე მითითებით, მინდა გამოვხატო გულწრფელი მწუხარება, რომ ჩემი სატელეფონო საუბრის გარკვეული ნაწილი კონტექსტიდან ამოგლეჯილია.

• როგორც სამეზობლო და გაფართოების საკითხებზე პასუხისმგებელი კომისარი, მე რეგულარულ კონტაქტზე ვარ ჩემი პორტფელის ქვეყნების მთავრობის წარმომადგენლებთან, საკომუნიკაციო არხები ყოველთვის ღია უნდა იყოს პირდაპირი პოლიტიკური გაცვლისთვის.

საქართველოს ამჟამინდელ პოლიტიკურ ვითარებაში, მე დიდ ძალისხმევას ვდებ იმაში, რომ საქართველოს პოლიტიკური ხელმძღვანელობა გადამერწმუნებინა უცხოური გავლენის გამჭვირვალობის შესახებ კანონის მიღებასთან დაკავშირებით. ამ კანონმა, შესაძლოა, ძირი გამოუთხაროს საქართველოს გზას ევროკავშირისკენ.

• მე კარგად ვარ გაცნობიერებული ქართული საზოგადოების ძალიან მძაფრი პროევროპული განწყობის შესახებ, ჩემი სატელეფონო საუბრისას საჭიროდ ჩავთვალე, რომ პრემიერის ყურადღება გამემახვილებინა საკითხზე, რომ ამ კანონის მიღებით არ გამწვავებულიყო ისედაც მყიფე მდგომარეობა, რასაც, შესაძლოა, მოჰყვეს კიდევ უფრო მეტი პოლარიზაცია და თბილისის ქუჩებში უკონტროლო სიტუაცია. ამასთან დაკავშირებით, სლოვაკეთის ბოლო ტრაგიკული მოვლენა იქნა მოყვანილი, როგორც მაგალითი და მითითება იმაზე, თუ სად შეიძლება მიგვიყვანოს პოლარიზაციის ასეთმა მაღალმა დონემ საზოგადოებაში, თუნდაც ევროპაში.

კიდევ ერთხელ, ვწუხვარ, რომ ჩემი სატელეფონო ზარის ერთი ნაწილი არა მხოლოდ მთლიანად იქნა ამოღებული კონტექსტიდან, არამედ საზოგადოებისთვის იყო წარმოდგენილი ისე, რომ ჩემი სატელეფონო ზარის თავდაპირველი მიზნის სრულიად არასწორი ინტერპრეტაცია შეიძლება მოჰყვეს."

რა თქვა დღეს კობახიძემ: "ერთ-ერთი ევროკომისარი" მუქარაში დაადანაშაულა.

• კონკრეტულად, მისი თქმით, დაემუქრნენ ფრაზით, "ხომ ნახეთ, ფიცოს რა დაემართა და ძალიან ფრთხილად უნდა იყოთო".
• საქართველოს პრემიერ-მინისტრმა ეს განცხადება "გლობალური ომის პარტიას" დაუკავშირა.

მან განცხადება გაავრცელა, სადაც დაწერა, რომ მისთვის "უკიდურესად შემაშფოთებელია", როდესაც "გამჭვირვალობის შესახებ კანონთან დაკავშირებული შანტაჟის კონტექსტში" ახსენებენ სლოვაკეთის პრემიერ-მინისტრს, რომელზეც რამდენიმე დღის წინ ტერორისტული თავდასხმა განხორციელდა და რომელიც ამჟამადაც მკურნალობას გადის:

• "ხაზს გავუსვამ იმასაც, რომ წინასწარი ინფორმაციით, პრემიერ-მინისტრზე თავდასხმის უკან იკვეთება ერთ-ერთი ქვეყნის სპეცსამსახურის კვალი, რომელიც გლობალურ ომის პარტიასთან განსაკუთრებით მჭიდროდ არის დაკავშირებული".

პრემიერ-მინისტრი წერს, რომ პრევენციის მიზნით, თავი ვალდებულად მიიჩნია, მუქარის შესახებ საზოგადოებისთვის ემცნო:

• "რობერტ ფიცოს მკვლელობის მცდელობასთან გავლებული პარალელი შეგვახსენებს, რომ გლობალური ომის პარტიის სახით, საქმე გვაქვს უაღრესად საშიშ ძალასთან, რომელიც საქართველოში არეულობის შემოსატანად ყველაფერზეა წამსვლელი".

სწორედ ოლივერ ვარჰეის განცხადებიდან გაირკვა, თუ რომელ ევროკომისარს უკავშირებს ირაკლი ღარიბაშვილი "უაღრესად საშიშ ძალას".

ასევე, ნახეთ: პრემიერის თქმით, გლობალური ომის პარტიასთან ბრძოლა პერსონალურ რისკებთან არის დაკავშირებული — რას ებრძვის მმართველი პარტია