ტელეკომპანია რუსთავი 2-ის დირექტორი, ნიკა გვარამია ტელევიზიის შენობაში გაჩენილ ხანძარს ფეისბუკის საშუალებით ეხმიანეა. მისი თქმით, "ერთი შეხედვით ზანი დიდი არაა", თუმცა ხანძრის კერა იქაა, სადაც ყველაზე მეტი საკომუნიკაციო კვანძია.

არხის დირექტორის თქმით, მაუწყებლობა იმის გამო არ შეწყდა, რომ მათი ეთერი დელისის მეტროსთან მდებარე ოფისიდან იმართება.

"გამორიცხულია, მე ქვეყნიდან გავიდე და რ2ის თავს რამე არ მოხდეს - სარჩელი, ყადაღა, ინკასო... ახლა უკვე ხანძარი", - წერს გვარამია ფეისბუკზე.

არხის საინფორმაციო სამსახურის უფროსმა, ნოდარ მელაძემ განაცხადა, რომ თუ არხის სტუდიები დაზიანებული იქნება და სანდრო ეულის ქუჩაზე მდებარე შენობიდან ეთერში გასვლას ვერ შეძლებენ, გამოიყენებენ დელისის მეტროსთან არსებულ სტუდიას. მისივე ინფორმაციით, ტექნიკის დიდი ნაწილი არხის თანამშრომლებმა ხანძრის გაჩენიდან რამდენიმე წუთშივე გადაარჩინეს, ზუსტი ზარალი კი ამ დროისთვის არ იციან.

მეხანძრე-მაშველმა რუსთავი 2-თან საუბრისას განაცხადა, რომ ტელევიზიაში საშუალო სიძლიერის ხანძარი იყო და დაახლოებით 25-30 მ2 ფართობია დამწვარი. მისივე თქმით, კერძოდ, იწვოდა დამხმარე სათავსო მეურნეობა - დამწვარია დეკორაციის ნაწილი და რამდენიმე ძველი სკამი, სტუდიაში კი ცეცხლი არ შესულა.

ტელევიზიის შენობაში შუაღამისას გაჩნდა ხანძარი, რომელიც უკვე ლოკალიზებულია. საგანაგებო სიტუაციების მართვის სამსახურის ინფორმაციით, ამ ეტაპზე ცეცხლის გავრცელების საშიშროება არ არსებობს. როგორც უწყებაში განმარტავენ ადგილზე გამოძახების შემდეგ 6 სახანძრო ავტომობილი მივიდა.