უფლებადამცველთა ჯგუფი მემორიალი იტყობინება, რომ ჩეჩენმა სამართალდამცველებმა 80-90 ადამიანი გაიტაცეს მას შემდეგ, რაც ერთმა პირმა დაწვა კადიროვების სიმბოლოებით მორთული მანქანა.

ჯგუფის ინფორმაციით, გატაცებულები დაკავშირებულები იყვნენ კაცთან, რომელმაც დაწვა მანქანა, სანომრე ნიშნით Dustum — ამ სერიას ჯერ ჩეჩნეთის ლიდერი, რამზან კადიროვი, ახლა კი — მისი შვილი, ადამ კადიროვი იყენებს.

ჩეჩნურმა ოპოზიციურმა ტელეგრამის არხმა 1ADAT, გააზიარა კადრები, რომლებიც, სავარაუდოდ, 6 მაისს მომხდარ ინციდენტს ასახავს. კადრების მიხედვით, კაცი სითხეს ასხამს მანქანას, სანომრე ნიშნით Dustum და შემდეგ ცეცხლს უკიდებს.

მანქანას გვერდითა კარებზე ეწერა K13, რაც "კომანდა 13-ს" ნიშნავს და ადამ კადიროვთან არის ასოცირებული.

"წარწერებს K13 და Dostum ატარებენ კადიროვის მონები, რომლებსაც სურთ ადამ კადიროვისთვის თავის მოწონება", — წერს 1ADAT.

ტელეგრამ არხი იტყობინება, რომ მამაკაცი, რომლის სახელი, მათი თქმით, საიფა-ისლამ ელმურზაევია, მომხდარის შემდეგ დააკავეს.

მემორიალშიც ვარაუდობენ, რომ მანქანის მფლობელს, ხელისუფლებისადმი ლოიალობის დემონსტრირება სურდა.

უფლებადამცველმა ორგანიზაციამ ჩაატარა გამოკითხვა თემებში, ადგილობრივი ტელეგრამ არხები გატაცებების შესახებ იტყობინებოდნენ და დაადგინა, რომ ჩეჩნეთის უსაფრთხოების ძალებმა, გავრცელებული ინფორმაციით, გაიტაცეს ელმურზაევის, დაახლოებით, 50 ნათესავი ურუს-მარტანის რაიონის სოფელ სტარიე ატაგიდან.

ასევე, ხელისუფლებამ გაიტაცა ორი მამაკაცი გუდერმესიდან და გროზნოდან, რადგან ეცვათ ისეთივე ქურთუკი, როგორიც ელმურზაევს, მანქანის დაწვის კადრებში.

მათ თქვეს, რომ ექვსი ადამიანი გაიტაცეს სოფელ გოისკოედან, მათ შორის, ყოფილი სამხედრო მოსამსახურე, რომელმაც დაზიანებები მიიღო უკრაინაში ბრძოლის დროს. ის, გავრცელებული ინფორმაციით, გატაცების შემდეგ ფრონტზე დააბრუნეს.

ასევე, შალიდან გაიტაცეს 30-ზე მეტი ადამიანი, რომელთაგან ოთხი დარჩა გროზნოს პოლიციის დეპარტამენტში, ხოლო დანარჩენები ქალაქში დააბრუნეს.

შალიდან დაკავებულთაგან ერთს ბრალი წაუყენეს იარაღის უკანონო შენახვაში, მეორე კი, გავრცელებული ინფორმაციით, მძევლად აიყვანეს. ხელისუფლება ითხოვს, ჩეჩნეთში დაბრუნდეს მათი ძმა, რომელიც ამჟამად საზღვარგარეთ ცხოვრობს.

1ADAT-მა განაცხადა, რომ გატაცებულთაგან ერთი, 30 წლის შშმ მამაკაცი, რომელიც იდენტიფიცირებულია სახელით აბდულა, პატიმრობაში გარდაიცვალა. მათი თქმით, ხელისუფლებამ მამაკაცის ცხედარი ახლობლებს დაუბრუნა, რომლებმაც განაცხადეს, რომ მას წამების ნიშნები აღენიშნებოდა.

მამაკაცის ოჯახს განუცხადეს, რომ ის გულის უკმარისობით გარდაიცვალა.

"ახლა ჩეჩენი ხალხის მტრები აკონტროლებენ დაკრძალვის ცერემონიალს, რომ ვერავინ შეძლოს, ფოტო ან ვიდეო გადაუღოს აბდულას ცხედარს".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.