მოკლედ: დავით ქაცარავა ამბობს, რომ რუსული კანონის საპროტესტო აქციაზე, მშვიდობიან დემონსტრანტებსა და სპეცრაზმელებს შორის იდგა და სამართალდამცველებს ესაუბრებოდა, როდესაც ათობით სპეცრაზმელმა ის ძალის გამოყენებით, კორდონში შეათრია და ადგილზე წიხლებით გაუსწორდა.

  • "დაახლოებით ნახევარი საათის განმავლობაში, ოთხჯერ მცემეს უმოწყალოდ და გამეტებით", — თქვა ქაცარავამ ტელეკომპანია პირველთან.

დეტალები: ანტისაოკუპაციო მოძრაობის ლიდერის თქმით, დაკავების შემდეგ, სამართალდამცავებმა ჭიჭინაძის ქუჩაზე გადაიყვანეს, სადაც კიდევ ერთხელ გაუსწორდნენ ფიზიკურად: "ცემის დროს სურათებს და ვიდეოებს მიღებდნენ".

  • ქაცარავა ამბობს, რომ მძიმე დაზიანებების გამო, პოლიციის თანამშრომლებმა სამგორის განყოფილებაშივე მიიღეს გადაწყვეტილება, რომ ის ინგოროყვას კლინიკაში გადაეყვანათ.
  • "ღრმად ვარ დარწმუნებული, რომ ეს იყო შეკვეთილი ეგზეკუცია. რაც შეეხება ოპერაციას, თვალბუდის ძვალი არის ჩამტვრეული, ასევე ჩამტვრეულია ზედა ყბა, სერიოზული ჰემატომები მაქვს თავზე. ტვინის შერყევა მაქვს საკმაოდ მძიმე ფორმის, ჩატარდა ოპერაცია", — თქვა ქაცარავამ.

კონტექსტი: დავით ქაცარავა სპეცრაზმმა გუშინ, 14 მაისს, პარლამენტთან დააკავა, რუსული კანონის მიღების შემდეგ.

  • სპეციალური საგამოძიებო სამსახურის განცხადებით, ქაცარავას ცემის ფაქტზე, გამოძიება დაიწყეს.

მსგავსი: დავით ქაცარავას ოპერაცია ჩაუტარდა — მას სახის ძვლების მოტეხილობები აქვს

გუშინვე, სახალხო დამცველი ლევან იოსელიანი დავით ქაცარავას ცემის ფაქტს გამოეხმაურა და განაცხადა, რომ შემაშფოთებელია იმ ძალადობრივი ქმედებების ხილვა, რასაც სამართალდამცავი უწყება არაერთ შემთხვევაში კვლავ იყენებს.