მოკლედ: ქვეყანაში შექმნილი სიტუაციიდან გამომდინარე, პარტია ლელო მიიჩნევს, რომ საჭიროა ფართო საზოგადოებრივი კონსოლიდაცია და მშვიდად, მყარი ნერვებით პროტესტის გაგრძელება და სამოქმედო სტრატეგიის შეთანხმება.

  • ამისთვის ლელოს საგანგებო წინადადება აქვს.

დეტალები: ლელოს მიერ გავრცელებულ განცხადებაში წერია, რომ საჭიროა, სასწრაფოდ დაიწყოს კოორდინირებული კონსულტაციები კანონის მოწინააღმდეგე საზოგადოების, ახალგაზრდობის და პარტიების მონაწილეობით.

  • "მთელი ჩვენი ძალისხმევა მიმართული უნდა იყოს რუსული ხელისუფლების არჩევნებში დამარცხებისკენ და ხელისუფლებიდან ჩამოშორებისკენ. ერთობლივი ძალებით უნდა შეიქმნას ეროვნული წინააღმდეგობის ევროპული პლატფორმა, და ამ პროცესში უმნიშვნელოვანესად მიგვაჩნია პრეზიდენტ სალომე ზურაბიშვილთან მჭიდრო კოორდინაცია", — წერია განცხადებაში.

ლელო მზად არის, პირველი ნაბიჯი გადადგას.

  • "ვაცხადებთ მორატორიუმს და მოვუწოდებთ ყველა ოპოზიციურ პარტიას ურთიერთ-თავდაუსხმელობისკენ. ჩვენი დებატები უნდა ემსახურებოდეს მხოლოდ "ოცნების" დემონტაჟს. ჩვენი საუბრები და კოორდინაცია უნდა ემსახურებოდეს მხოლოდ რუსული ხელისუფლების ძალაუფლებისგან ჩამოშორებას", — ვკითხულობთ ლელოს განცხადებაში.

ბოლო ხაზი: რუსული კანონი პარლამენტმა, მესამე მოსმენით, დღეს მიიღო.

  • სალომე ზურაბიშვილი მას ვეტოს დაადებს.
  • თუმცა, ეს ფორმალური ნაბიჯი იქნება, რადგან ქართულ ოცნებას ვეტოს დაძლევის რესურსი აქვს.