მოკლედ: საქართველოს ეროვნული პლატფორმის წევრები შეშფოთებას გამოხატავენ დღეს, 14 მაისს, საქართველოს პარლამენტში, რუსული კანონის მიღების გამო.

დეტალები: პლატფორმა აცხადებს, რომ სამოქალაქო საზოგადოებისა და დამოუკიდებელი მედია ორგანიზაციების უცხო ძალის ინტერესების გამტარებლად რეგისტრირება, რასაც ახლა უკვე მიღებული კანონი დაავალდებულებს მათ, შეურაცხყოფს მათ ღირსებას, ძირს უთხრის თანამშრომლობას საერთაშორისო პარტნიორებთან და საფრთხეს უქმნის საქართველოს მიღწეულ პროგრესს ყველა სექტორში.

  • "მიუღებელია ის ანტიდასავლური რიტორიკა, რომელიც თან სდევს კანონის განხილვის პროცესს და საფრთხის ქვეშ აყენებს საქართველოს ურთიერთობებს ევროკავშირის, მის წევრ ქვეყნებს, შეერთებულ შტატებსა და სხვა მოკავშირეებთან, რომლებიც მხარს უჭერდნენ საქართველოს დემოკრატიზაციას დამოუკიდებლობის მიღებიდან დღემდე".

პლატფორმის მიხედვით, საქართველომ ბოლო 30 წლის განმავლობაში დემოკრატიზაციის და ევროინტეგრაციის გზაზე არაერთი წარმატებული ნაბიჯი გადადგა, თუმცა, დღეს "გვიწევს ვთქვათ რომ საქართველოს დემოკრატია უმძიმესი გამოცდის წინაშე დგას".

  • "ამ კანონმა ქართულ საზოგადოებას მკაფიოდ დაანახა მიზნები რომელსაც ის ემსახურება: ძალადობა, სტიგმატიზაცია, განსხვავებული აზრის დევნა, საზოგადოების გახლეჩა, დაპირისპირება და ევროინტეგრაციის პროცესის ჩიხში შეყვანა".
  • საქართველოს ეროვნული პლატფორმა წერს, რომ მე-3 მოსმენით მიღებული რუსული კანონი ევროინტეგრაციის გზაზე კედლად იქცა.

კონტექსტი: დღეს, 2024 წლის 14 მაისს, საქართველოს პარლამენტმა რუსული კანონი მესამე, საბოლოო მოსმენით მიიღო.

  • კანონს მხარი დაუჭირა 84-მა დეპუტატმა, წინააღმდეგი იყო 30.