მოკლედ: საპოლიციო ძალებმა მომიტინგეებს დაატოვებინეს ჩიტაძის ქუჩა, საიდანაც პარლამენტის შენობაში შესასვლელია. ამას მცირე დაპირისპირებები მოჰყვა აქციის მონაწილეთა და პოლიციას შორის.

  • სამართალდამცავების მიზანია, დემონსტრაციის გარეშე შეძლონ პარლამენტში შესვლა ქართული ოცნების დეპუტატებმა, რომლებიც მალე დაიწყებენ რუსული კანონის საკომიტეტო განხილვას.
  • პარლამენტის უკანა შესასვლელთან განლაგებულია სპეცრაზმი და წყლის ჭავლის მანქანაც.
  • სამართალდამცავების მობილიზებაა 9 აპრილის ქუჩასთანაც.
  • ამის პარალელურად, მშვიდობიანი პროტესტი ისევ მიმდინარეობს პარლამენტის შენობის წინ და მოქალაქეებს მოუწოდებენ, მივიდნენ რუსთაველის გამზირზე.
  • საქართველოს ახალგაზრდა იურისტთა ასოციაციამ განცხადებით მიმართა შსს-ს, მისცეს მშვიდობიან დემონსტრანტებს პროტესტის გაგრძელების კონსტიტუციური უფლება.

იქამდე, ვიდრე პოლიცია მომიტინგეებს პარლამენტის შენობის გვერდითა და უკანა ტერიტორიიდან გაიყვანდა, შინაგან საქმეთა სამინისტრომ განცხადება გაავრცელა.

  • უწყებამ მოუწოდა აქციის ორგანიზატორებსა და მონაწილეებს, გაეთავისუფლებინათ საკანონმდებლო ორგანოს შესასვლელები და მიეცათ დეპუტატებისა და აპარატის თანამშრომლებისთვის პარლამენტის შენობაში შესვლის შესაძლებლობა.
  • შსს-ს განცხადების მომენტში მომიტინგეებს პარლამენტის შესასვლელები არ ჰქონიათ პიკეტირებული.
  • შსს-მ დამატებითი საპოლიციო ძალების მობილიზება მოახდინა 04:40 საათისთვის.

აქციის შესახებ: საქართველოს პარლამენტთან მშვიდობიანი საპროტესტო აქცია, სახელწოდებით — გავათენოთ საქართველოსთვის, 12 მაისს, 22:00 საათიდან დაიწყო.

  • შეკრებილებს, პარლამენტის შენობის წინ დამონტაჟებული სცენიდან, საზოგადოებისთვის ცნობილი სხვადასხვა პირები მიმართავდნენ.
  • დემონსტრანტებმა განაცხადეს, რომ პარლამენტის შენობასთან გაათენებენ ღამეს, რადგან 13 მაისს საქართველოს ღიად ანტიდასავლური ხელისუფლება რუსული კანონის მესამე საკომიტეტო მოსმენას გეგმავს. პლენარულ სხდომაზე კი კანონი სამშაბათს, 14 მაისს გავა ბოლო, მესამე მოსმენით.

მანამდე: შინაგან საქმეთა მინისტრმა, ვახტანგ გომელაურმა ბრიფინგი გამართა და თქვა, რომ პარლამენტის ბლოკირების შემთხვევაში, აქციის მონაწილეებს სისხლის სამართლის მუხლით დააკავებენ, რაც 4-წლიან პატიმრობას გულისხმობს.

  • მისი განცხადებიდან მალევე, თავისუფლების მოედანზე დიდი ოდენობით სპეციალური საპოლიციო ძალების მობილიზება დაიწყო.
  • შსს-მ, აქციის დაწყებამდე განალაგა სპეცრაზმი უშუალოდ პარლამენტის შენობის შიდა ეზოშიც და ასევე, სახელმწიფო უსაფრთხოების სამსახურის ეზოში.
  • სამართალდამცველებმა შეადუღეს პარლამენტის გვერდითა ქუჩებზე გასასვლელი ჭიშკრებიც.

ფოტო: არა რუსულ კანონს

შს მინისტრის ბრიფინგს წინ უძღოდა პრემიერ-მინისტრის, ირაკლი კობახიძის განცხადება მედიისთვის, სადაც თქვა თქვა, რომ ხვალ და ზეგ საქართველოს პარლამენტი, რუსული კანონის მიღებით "აღასრულებს ქართული საზოგადოების ნებას."