მოკლედ: საქართველოს პარლამენტის თავმჯდომარის შალვა პაპუაშვილის თქმით, რუსული კანონის საწინააღმდეგო აქციებმა, მას ამ კანონის საჭიროება დაანახა.

  • "ამ დღეებმა, ამ აქციის ორგანიზატორებმა, მათმა გაუმჭვირვალობამ, დაგვანახა ამ [რუსული] კანონის საჭიროება. დღემდე არ ვიცით, თუნდაც ის ტექნიკური აღჭურვილობა ვისი დაფინანსებაა", — თქვა პაპუაშვილმა მედიასთან კომენტარში.

დეტალები: შეკითხვას, "იღებთ თუ არა ხალხის მოთხოვნას, რომ კანონპროექტის გაწვევა მოხდეს", პაპუაშვილმა უპასუხა, რომ აქციებმა მათ [მთავრობას] დაანახა, "ხალხის მხარდაჭერა ამ კანონპროექტის მიმართ".

  • პაპუაშვილის თქმით, პარლამენტი გააგრძელებს მსჯელობას რუსულ კანონზე: "ჩვენი პოზიცია ცხადია, ეს კანონი სჭირდება ქართველ ხალხს და ქართველი ხალხის პოზიციაც ცხადია, რომ მას სჭირდება ეს კანონი".

წინაისტორია: ბოლო რამდენიმე დღეა, რაც საქართველოში ხალხი რუსული კანონის მიღებას აპროტესტებს საკანონმდებლო ინიციატივის საპარლამენტო განხილვების პარალელურად.

  • აქციები არა მხოლოდ თბილისში, სხვა რეგიონებშიც იმართება.

გუშინ, 17 აპრილს, მთავრობის ადმინისტრაციასთან აქციის მონაწილეებსა და პოლიციელებს შორის დაპირისპირება მოხდა.

  • საქართველოს პარლამენტთან, რუსული კანონის გასაპროტესტებლად შეკრებილი მოქალაქეები, კანცელარიასთან ავიდნენ იმ მიზნით, რომ ირაკლი კობახიძესთან შეხვედრა მოეთხოვათ.
  • შინაგან საქმეთა სამინისტრომ კანცელარიასთან 2 პირი დააკავა.
  • ტვ პირველმა განაცხადა, რომ დაშავდა მათი ოპერატორი და ასევე, აქციის ზოგი მონაწილე.

მსგავსი: მთავრობის ადმინისტრაციასთან აქციის მონაწილეებსა და პოლიციელებს შორის დაპირისპირებაა