რა ხდება: დღეს, 2024 წლის 15 აპრილს, საქართველოს პარლამენტის იურიდიული კომიტეტი ქართული ოცნების მიერ წარდგენილ და მხარდაჭერილ რუსულ კანონს განიხილავს.

  • ხვალ კი, 16 აპრილს, პარლამენტის საიტზე გამოქვეყნებული გრაფიკის თანახმად, ქართული ოცნების საპარლამენტო უმრავლესობა კანონპროექტს პირველი მოსმენით დაუჭერს მხარს პლენარულ სხდომაზე.

ფოტო: პარლამენტის ვებგვერდი

პროცედურულად: კანონპროექტის პლენარულ სხდომაზე პირველი მოსმენით გასვლას წინ დღევანდელი საკომიტეტო განხილვა უძღვის.

  • შემდეგი ეტაპი ბიურო სხდომა იქნება, რომელიც ხვალ, პლენარული სხდომის გამართვამდეა ჩანიშნული.
  • ზოგადად, კანონპროექტის მისაღებად საჭიროა დეპუტატების სამი მოსმენით მხარდაჭერა პლენარულ სხდომაზე.
  • რუსული კანონის საბოლოო, მესამე მოსმენით მხარდაჭერის თარიღად 17 მაისია განსაზღვრული.
  • კანონი, მიღების შემთხვევაში, პრეზიდენტს გადაეგზავნება.
  • პრეზიდენტის საპარლამენტო მდივანმა თქვა, რომ სალომე ზურაბიშვილი კანონს ვეტოს დაადებს.
  • თუმცა, ამის შემდეგ, საპარლამენტო უმრავლესობა ვეტოს დაძლევას შეეცდება, მას დასაძლევად საკმარისი მანდატი აქვს.

რა ხდება დღეს: კომიტეტის სხდომა ხმაურითა და ფიზიკური დაპირისპირებით მიმდინარეობს — მას შემდეგ, რაც პარტია მოქალაქეების ლიდერმა, ალეკო ელისაშვილმა საპარლამენტო უმრავლესობის ლიდერსა და რუსული კანონის წარმდგენს, მამუკა მდინარაძეს დაარტყა, ალეკო ელისაშვილს ქართული ოცნების რამდენიმე დეპუტატი ფიზიკურად, ჯგუფურად გაუსწორდა.

განხილვა პოლიტიკური ცენზურით: იურიდიული კომიტეტის თავმჯდომარემ ანრი ოხანაშვილმა მიკროფონი გაუთიშა პარლამენტის ოპოზიციონერ დეპუტატს, ხატია დეკანოიძეს, მხოლოდ იმის გამო, რომ საპარლამენტო განხილვისას მან გამოიყენა ფრაზა — რუსული კანონი.

საგულისხმოა, რომ ამავე მიზეზით — საკანონმდებლო ინიციატივის რუსულ კანონად სახელდების გამო, პარლამენტის პლენარული სხდომათა დარბაზი დაატოვებინა შალვა პაპუაშვილმა ალეკო ელისაშვილს 3 აპრილს.

  • გარდა ამისა, ანრი ოხანაშვილმა დღის ბოლოს დარბაზი დაატოვებინა დეპუტატებს: ხაბეიშვილს, ვაშაძეს, მანჯგალაძესა და დეკანოიძეს.

პროტესტი პარლამენტის შენობის ირგვლივ: მოსახლეობის ნაწილი დილიდან აპროტესტებს რუსული კანონის საპარლამენტო განხილვებს. აქცია დაიწყო დილის 10:00 საათზე, პარლამენტის შენობის უკან.

  • პროტესტი გაგრძელდება დღევე, საღამოს 7 საათზე პარლამენტის წინ.