აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის წევრი ორგანიზაციები მიიჩნევენ, რომ საქართველოდან გაუჩინარებული აზერბაიჯანელი ჟურნალისტის მუხტარლის საქმის გამოძიებისთვის საკმარისი დრო იყო. ორგანიზაციებს მიაჩნიათ, რომ საქმის გამოძიება ჭიანურდება, რითაც ლახავს ქვეყნის იმიჯს საერთაშორისო საზოგადოების წინაშე და კითხვის ნიშნის ქვეშ აყენებს ადამიანის უფლებებისა და უსაფრთხოების დაცვას საქართველოში. ამ შინაარსის განცხადება ეროვნული პლატფორმის წევრმა ორგანიზაციებმა დღეს, 22 ივლისს გაავრცელეს.

მათი აზრით, საქმის გამოსაძიებლად აუცილებელია შეიქმნას დროებითი საპარლამენტო საგამოძიებო კომისია.

"ევროპარლამენტის მიერ აფგან მუხთარლის საქმეზე მიღებულ სპეციალურ რეზოლუციაშიც ხაზგასმულია, რომ მნიშვნელოვანია საქართველოს ხელისუფლებამ ნათელი მოჰფინოს ყველა იმ ეჭვს, რომელიც უკავშირდება საქართველოს უსაფრთხოების სამსახურების ჩართულობას ძალის გამოყენებით ჟურნალისტის გაუჩინარებაში, მოუწოდებს ხელისუფლებას დაიცვას ადამიანის უფლებათა ევროპული კონვენციით ნაკისრი ვალდებულებები და უზრუნველყოს, მუხტარლის საქართველოში, საკუთარ ოჯახში დაბრუნება", - ვკითხულობთ განცხადებაში.

საქართველოს ეროვნულ პლატფორმაში შემავალი ორგანიზაციები საქმის ობიექტურ გამოძიებასა და დამნაშავეების დასჯას მოითხოვენ. გარდა ამისა, განცხადებაში აღნიშნულია, რომ გამოძიებასთან დაკავშირებით საზოგადოება ინფორმირებული იყოს.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

საქართველოს ეროვნულ პლატფორმაში შემავალი ორგანიზაციების სია.