რა ხდება: სპეციალურმა საგამოძიებო სამსახურმა, პატრულის მიერ მოქალაქის, მალხაზ გიორგაძის დაკავებისას განხორციელებული სამსახურებრივი უფლებამოსილების ძალადობით შესაძლო გადამეტების ფაქტზე, გამოძიება დაიწყო.

დეტალები: პოლიციამ მალხაზ გიორგაძე გუშინ, 8 აპრილს დააკავა.

შსს-ს ინფორმაციით, პოლიციელებმა, სამსახურებრივი მოვალეობის შესრულებისას, შენიშნეს მანქანა, რომელიც გზის სავალი ნაწილის გვერდულზე იდგა.

  • მათი ცნობით, მძღოლმა, პოლიციის ეკიპაჟის დანახვისას, დაძრა ავტომობილი, შეეჯახა სავალი ნაწილის გვერდულს და სცადა მიმალვა.
  • ასევე, შსს-ს განცხადების მიხედვით, პატრულ-ინსპექტორებმა არაერთხელ მოუწოდეს ავტომობილის მძღოლს დამორჩილებოდა პოლიციელების კანონიერ მოთხოვნას.
  • "მიუხედავად პოლიციის მხრიდან გაკეთებული არაერთი მოწოდებისა, რომ აღნიშნულ პიროვნებას შეენარჩუნებინა სიმშვიდე, ნასვამ მდგომარეობაში მყოფი მძღოლი იქცეოდა აგრესიულად.
  • მანქანიდან გადმოსვლის შემდეგ, ცივი იარაღის დემონსტრირებით, პატრულ-ინსპექტორებს სიცოცხლის მოსპობით ემუქრებოდა. ასევე, მან ფიზიკური შეურაცხყოფა მიაყენა ადგილზე მყოფ ერთ-ერთ პოლიციელს", — წერია შსს-ს განცხადებაში.
  • ასევე, უწყების ინფორმაციით, გიორგაძე, რომელიც არაერთხელ არის სხვადასხვა მძიმე დანაშაულისთვის ნასამართლევი, პოლიციამ დააკავა.

მთავარის ინფორმაციით, თავად გიორგაძე პოლიციის თანამშრომლებს ძალადობასა და ფიზიკურ ანგარიშსწორებაში ადანაშაულებს.

  • ის ჰყვება, რომ პოლიცია საცხოვრებელ სახლში წაჰყვა, შეიჭრნენ მის ბინაში და ფიზიკური შეურაცხყოფა მიაყენეს მას და მის ხანშიშესულ მამას.
  • ოჯახის ცნობით, ჩხრეკის ორდერის არარსებობის მოუხედავად, პოლიციის თანამშრომლებმა გაჩხრიკეს ბინა. ნაცემი კაცი კლინიკა "ვივამედშია" გადაყვანილი.