რა ხდება: საქართველოს პრეზიდენტმა, ორბელიანების სასახლეში, დიპლომატიური კორპუსის წარმომადგენლებთან მეორედ ინიციირებული რუსული კანონის მოსალოდნელი შედეგები და ქვეყანაში შექმნილი მდგომარეობა განიხილა.

ინფორმაციას პრეზიდენტის ადმინისტრაცია ავრცელებს.

დეტალები: ადმინისტრაციის ცნობით, დიპლომატიური კორპუსის წარმომადგენლებმა შეშფოთება გამოხატეს ინიციირებული კანონპროექტის შესახებ.

მათ თქვეს, რომ ეს საფრთხეს უქმნის საქართველოს ევროპულ ინტეგრაციას.

  • სალომე ზურაბიშვილმა კი აღნიშნა, რომ საქართველოს ევროპულ გზას და ევროინტეგრაციას ალტერნატივა არ აქვს.
  • "ქართველმა ხალხმა ერთხელ უკვე უთხრა უარი რუსულ კანონს და ახლაც პასუხი მხოლოდ ერთია - ეს არჩევნებით ჩვენი ევროპული სათქმელის თქმაა", — თქვა სალომე ზურაბიშვილმა.
  • შეხვედრას ესწრებოდნენ ევროკავშირის წევრი ქვეყნების, აშშ-ის და დიდი ბრიტანეთის ელჩები და საელჩოს წარმომადგენლები.

კონტექსტი: 2024 წლის 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ, განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები და არასამთავრობო ორგანიზაციები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".
  • გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.
  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.