რა ხდება: პროევროპული ოპოზიციური პოლიტიკური პარტიები ერთიან განცხადებას ავრცელებენ, რომელშიც აცხადებენ, რომ რუსული კანონი საქართველოს ევროპული გზის ღალატია, ხელისუფლების ერთადერთი მიზანი კი ძალაუფლებისა და ანტისახელმწიფოებრივი, კორუფციული ქმედებებით მოხვეჭილი ქონების შენარჩუნებაა.

  • ერთობლივ განცხადებას ხელს აწერენ პარტიები: ახალი, გირჩი — მეტი თავისუფლება, დროა, ერთიანი ნაციონალური მოძრაობა, ლელო საქართველოსთვის, რესპუბლიკური პარტია და სტრატეგია აღმაშენებელი.

პარტიების განცხადება: "ჩვენ, ქართული პროდასავლური პოლიტიკური ძალები, ვგმობთ ქართული ოცნების მიერ რუსული კანონის ხელახლა ინიციირებას. ეს არის საქართველოს მოქალაქეებისა და ჩვენი სტრატეგიული პარტნიორებისთვის მიცემული სიტყვის კიდევ ერთხელ გატეხა და იმ ახალგაზრდების აბუჩად აგდება, რომლებმაც 1 წლის წინ დაიცვეს ჩვენი ისტორიული არჩევანი და ამით ჩვენს სამშობლოს შეუნარჩუნეს შანსი გახდეს ევროკავშირის სრულფასოვანი წევრი.

  • დღეს, ქართული ოცნების ერთადერთ მიზანს წარმოადგენს ძალაუფლებისა და ანტისახელმწიფოებრივი, კორუფციული ქმედებებით მოხვეჭილი ქონების შენარჩუნება. მაშინ როდესაც ხელისუფლება თავად იქცა სიღარიბის, კორუფციის, ფასების კატასტროფული ზრდის და ქვეყნიდან მოქალაქეების გადინების მთავარ მიზეზად, ივანიშვილი ცდილობს პუტინის სტილში ჩაახშოს კრიტიკული ხმა და მოგუდოს თავისუფალი საზოგადოება. მმართველი ძალა სრულად დაიცალა ევროპული ღირებულებებისა და პრინციპებისგან.
  • ხელისუფლების მიერ ხელახლა ინიციირებული რუსული კანონის მიღების შემთხვევაში, საქართველო ასცდება ევროპულ გზას და საქართველოს რიგითი მოქალაქისთვის ევროკავშირის წევრობით გარანტირებული უსაფრთხოების, მშვიდობისა და კეთილდღეობის კარი კიდევ დიდი ხნით დაიკეტება."

ბოლო ხაზი: განცხადების ავტორები აღნიშნავენ, რომ ახლა არის ისტორიული მომენტი, რათა უმთავრეს პრიორიტეტად იქცეს ცვლილება, რომელიც მოიტანს მრავალპარტიულ, დემოკრატიულ მმართველობას, ეს კი საქართველოს ევროპის ოჯახში დაბრუნების გარანტია.

რედაქციისგან: რატომ არის ქართული ოცნების კანონი რუსული — მოკლედ და მარტივად