მოკლედ: თბილისის მერი, კახა კალაძე ამბობს, რომ სამტრედიის ქუჩაზე კორპუსის აფეთქების გამომწვევი სავარაუდო მიზეზი ბუნებრივი აირის გაჟონვაა, "თუმცა, ჯერ საგამოძიებო მოქმედებები დასრულებული არაა", — თქვა მან.

  • კალაძემ მედიასთან განაცხადა, რომ ყველა ოჯახს, რომელსაც აფეთქების შედეგად საცხოვრებელი ფართები დაუზიანდა, თბილისის მერია დაეხმარება.
  • "აღნიშნულ კორპუსში მცხოვრებლები დროებით სასტუმროებში არიან გადაყვანილები, ზოგმა კი თავისი სურვილით ახლობლების სახლში დარჩენა ისურვა", — უთხრა ჟურნალისტებს.
  • მისი თქმით, მერიიდან ყველა იმ ოჯახს დაეხმარებიან, ვისაც აფეთქების შედეგად საცხოვრებელი ფართები დაუზიანდა.

"გადავრჩით, რომ მსხვერპლი არ არის", — განაცხადა კახა კალაძემ და თქვა, რომ მომხდარი, სავარაუდოდ, ბუნებრივი აირის გაჟონვამ გამოიწვია.

კახა კალაძე: "ჩვენ, რა თქმა უნდა, დღესვე ჩავატარებთ ექსპერტულ კვლევებს, რომ დავადგინოთ როგორია კორპუსის მდგომარეობა. როგორც კი შესაბამისი დასკვნა გვექნება, მაშინვე დავიწყებთ სამუშაოებს, რომ აღნიშნული კორპუსი გამაგრდეს და მოწესრიგდეს."

რა მოხდა: პირველადი ვერსიით, აფეთქება სავარაუდოდ, გაზის გაჟონვამ გამოიწვია თბილისში, დიდუბის რაიონში, სამტრედიის ქუჩა #2-ში.

  • აფეთქება 14 მარტს, გამთენიისას, საცხოვრებელი კორპუსის პირველ სართულზე მოხდა, კომერციულ ფართში. იქ სუპერმარკეტის გახსნა იგეგმებოდა.
  • საცხოვრებელ კორპუსში, მერიის თანახმად, 93 ოჯახი ცხოვრობს.

  • აფეთქებამ ნგრევა გამოიწვია და ავტომობილებიც დაზიანებულია.

  • შემთხვევის შედეგად, სიცოცხლისთვის საშიში დაზიანებები არავის მიუღია.

რას იკვლევს გამოძიება: On.ge-ს შინაგან საქმეთა სამინისტროდან განუცხადეს, რომ გამოძიება დაწყებულია 240 პრიმა მუხლით, რაც გულისხმობს ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას.

დეტალები: გამოძიება უსაფრთხოების წესების დარღვევაზე მიმდინარეობს, თუმცა "უშუალოდ კომერციულ ფართს გაზი არ მიეწოდებოდა", — უთხრა ტელეკომანია იმედს ირაკლი დეკანოიძემ, ის არის სწრაფი რეაგირების ცენტრის უფროსი.

  • "აფეთქება გამოიწვია ბუნებრივი გაზის დაგროვებამ — ჩვენ, ამ ვერსიას, არც ვადასტურებთ და არც უარვყოფთ, იქიდან გამომდინარე, რომ ჯგუფებს, კორპუსის დაზიანების გამო, არ მიეცა საშუალება შესულიყვნენ და დაეთვალიერებინათ.
  • თუმცა, ეს ვერსია მომდინარეობს იქიდან, რომ პირველ სართულზე მიმდინარეობდა სარემონტო სამუშაოები და შესაძლებელია, იქ ყოფილიყო რაიმე ინციდენტი გაზის დანადგარებთან, ან გაზის ქსელთან დაკავშირებული", — თქვა მან სატელევიზიო კომენტარში.

ბოლო ხაზი: მედიასთან კომენტარი გააკეთა თბილისის სახანძრო-სამაშველო ძალების მთავარი სამმართველოს უფროსმა, ლევან მუსელიანმა და აფეთქების გამომწვევ მიზეზად დაასახელა ბუნებრივი აირის გაჟონვა.