ცოტა ხნის წინ ნეტფლიქსზე პოპულარული ანიმაციური შოუ ავატარი: ჰაერის უკანასკნელი მბრძანებელი სერიალის სახით დაბრუნდა. შოუში არაერთი ცნობადი სახე გვხვდება, მაგალითად, ცეცხლის მბრძანებელ ოზაის როლს დაკარგულების მსახიობი დენიელ დაი კიმი ასრულებს, თუმცა გულშემატკივრებს ყველაზე მეტად ჯეიმს სის ნახვა გაუხარდათ.

ჯეიმსი ავატარის ანიმაციაში ყველასთვის საყვარელი პერსონაჟ კომბოსტოების გამყიდველს ახმოვანებდა, სერიალში კი იმავე გმირს განასახიერებს. შოუს სცენარისტმა, ალბერტ კიმმა, გადაღებებიც გაიხსენა და აღნიშნა, რომ ჯეიმსს გადამღები ჯგუფი კომბოსტოს გამყიდველის მაისურებით დახვდა.

"შოუს ქასთი ბევრი ცნობილი მსახიობისგან შედგებოდა, თუმცა ჯეიმსი მათ შორის ნამდვილი ვარსკვლავი იყო. ყველას უნდოდა, მასთან ფოტო გადაეღო, მათ შორის, მეც, განსაკუთრებით მას შემდეგ, რაც პერსონაჟის კოსტიუმი მოირგო", — თქვა კიმმა.

ავატარიდან ერთი-ერთი ყველაზე სასაცილო და დასამახსოვრებელი ფრაზის ავტორი სწორედ ჯეიმს სია — მისი პერსონაჟი გამუდმებით ყვირის სიტყვებს: "ჩემი კომბოსტოები!"მიუხედავად იმისა, რომ ამ სასაცილო გმირს განსაკუთრებული ისტორია ან სახელიც კი არ ჰქონია, მან მაყურებლებს თავი მარტივად შეაყვარა.

ჯეიმსი ასევე ახმოვანებს ისეთ ცნობილ ანიმაციებს, როგორებიცაა Kung Fu Panda და Jackie Chan Adventures. სერიალში კომბოსტოს გამყიდველის ცნობილი ფრაზას ანიმაციის ფრაზისგან ძლივს გაარჩევ, აი, ვიდეოც:

შეგახსენებთ, რომ ავატარი: ჰაერის უკანასკნელი მბრძანებელი სამყაროზე მოგვითხრობს, რომელიც ოთხი სტიქიის ნიშნის მიხედვითაა დაყოფილი: წყალი, ცეცხლი, მიწა და ჰაერი. ცეცხლის ხალხის მიერ სხვათა დაპყრობის შემდეგ სამყაროში მშვიდობის დაბრუნება მხოლოდ განსაკუთრებულ ადამიანს, ავატარს, შეუძლია, რომელიც ოთხივე სტიქიას ფლობს.

ამავე თემაზე:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…