მოკლედ: მარინა ხატიაშვილმა, რომელიც აღსრულების პოლიციამ 23 იანვარს საცხოვრებელი ბინიდან გამოასახლა, ბინა გამოისყიდა.

  • მარინა ხატიაშვილმა On.ge-ს უთხრა, რომ იპოთეკარს თანხა 23 თებერვალს გადაუხადა.

გაიგე მეტი: გამოსახლება კეკელიძის #1-დან — დეტალები ფოტოებში

დეტალები: "გამოსახლებიდან ერთ თვეში 20 000 უნდა მომეგროვებინა. ეს შევძელი, ჩემი მეგობარი მხატვრები და სხვა ხელოვანი ადამიანები დამეხმარნენ, მოაწყვეს აუქციონი, გაიყიდა ნახატები და ფულიც ასე შეგროვდა. მინდა უღრმესი მადლობა გადავუხადო მათ და ყველას ვინც 23 იანვარს ჩემს გვერდით იდგა", — თქვა On.ge-სთან მარინა ხატიაშვილმა.

კონტექსტი: 25 იანვარს მარინა ხატიაშვილი და იპოთეკარი შეთანხმდნენ, რომ ხატიაშვილს ბინა, 1 თვის ვადაში, 90 000 აშშ დოლარად უნდა გამოესყიდა.

  • როგორც მარინა ხატიაშვილმა გამოსახლების შემდეგ On.ge-ს უთხრა, მას 70 000 დოლარი უკვე ჰქონდა და ერთ თვეში 20 000 დოლარი უნდა მოეგროვებინა.
  • "70 ათასი [დოლარი] ხელში მიჭირავს, ეს არის, ახლობლების, ჩემი და ჩემი შვილის მეგობრების მიერ მობილიზებული თანხა. [დამრჩა] 20 ათასი, ერთ თვეში... ძალიან ადვილად უყურებენ, მე არ ვუყურებ ასე ადვილად. ალბათ შევძლებთ [გადახდას], რადგან სიტყვას რომ იტყვი, ის სიტყვა აღარ უნდა გატეხო", — გვითხრა On.ge-ს მარინა ხატიაშვილმა.

მსგავსი: სახლი გამოსახლების შემდეგ — ფოტორეპორტაჟი

ბოლო ხაზი: 23 იანვარს, კეკელიძის ქუჩის #1 კორპუსთან აღსრულების ეროვნული ბიუროს თანამშრომლებმა ხატიაშვილების ოჯახი ბინიდან გამოასახლეს.

  • აღსრულების ბიუროს თანამშრომლები ორი საათის განმავლობაში ცდილობდნენ ხატიაშვილების ბინაში შესვლას. სადარბაზოს და ხატიაშვილის ბინის კარები მათ შედუღებული დახვდათ.
  • გამოსახლების პროცესში, აღსრულების პოლიციას წინააღმდეგობას უწევდნენ ხატიაშვილების ოჯახის მხარდასაჭერად მისული აქტივისტები და მოქალაქეები.
  • საპოლიციო ძალებმა გამოსახლების პროცესის დროს ძალა გამოიყენეს, მოხდა ფიზიკური დაპირისპირება.
  • პოლიციამ დააკავა 20-მდე ადამიანი, მათ შორის, აღსრულების პოლიციის მანქანის დაზიანებისთვის დაკავებული გიორგი ხასაია და აკაკი ჩიქობავა მხოლოდ 3 თებერვალს გაათავისუფლეს.