კინომსახიობთა გილდიის ახალი პროტოკოლის მიხედვით, ინტიმური სცენების კოორდინატორებს მსახიობების თანხმობის გარეშე ამ სცენების გადაღების პროცესის საჯაროდ განხილვა ეკრძალებათ.

მათ პროტოკოლი მას შემდეგ გაამკაცრეს, რაც ჯენა ორტეგას ფილმ Miller's Girl-ის ინტიმური სცენების კოორდინატორმა მსახიობის გამოცდილებაზე მედიასთან ისაუბრა.

Miller’s Girl-ში 21 წლის ჯენა ორტეგა 18 წლის მოსწავლის როლს თამაშობს, რომელიც მასწავლებელთან სასიყვარულო ურთიერთობას იწყებს. ფილმში მასწავლებლის პერსონაჟს 52 წლის მარტინ ფრიმენი განასახიერებს.

ფილმი სოციალური ქსელების მომხმარებლებმა გამოსვლისთანავე გააკრიტიკეს, ამის მიზეზი კი ისაა, რომ ჯენა ორტეგა 30 წლით უფროს მსახიობთან ინტიმური სცენებში მონაწილეობს.

კრიტიკას ფილმის ინტიმური სცენების კოორდინატორი, კრისტინა არჯორა, გამოეხმაურა. კოორდინატორის თქმით, ჯენა ორტეგა დარწმუნებული იყო იმაში, რომ ინტიმური სცენების გადაღებაში მონაწილეობა სურდა და გადაღებების პროცესმაც შეთანხმების შესაბამისად ჩაიარა.

კინომსახიობთა გილდიამ პროტოკოლი ამ ინტერვიუდან რამდენიმე დღეში გაამკაცრა. მათი თქმით, კოორდინატორს ინტიმური სცენების განხილვა არამხოლოდ გადაღების პროცესში, არამედ ფილმის გამოსვლის შემდეგაც ეკრძალება და დეტალების საჯაროდ გაზიარება მხოლოდ მსახიობის თანხმობის შემთხვევაში აქვს. ამ წესის დარღვევის შემთხვევაში ის კინომსახიობთა გილდიის ინტიმური სცენების კოორდინატორთა სიიდან ამოიშლება და მის წინააღმდეგ გამოძიება დაიწყება.

"ინტიმური სცენების კოორდინატორი გადასაღებ მოედანზე მნიშვნელოვან როლს ასრულებს იმაში, რომ მუშაობისას მსახიობებმა თავი დაცულად, კომფორტულად და თავდაჯერებულად იგრძნონ.

ინტიმური სცენების კოორდინატორებმა უნდა დაიცვან მსახიობების კონფიდენციალურობა და ამ სცენების გადაღების პროცესზე მათი ნებართვის გარეშე საჯაროდ არ უნდა ისაუბრონ. ამ დეტალების გასაჯაროება თანხმობის გარეშე დაუშვებელია", — აცხადებს გილდია.

Miller’s Girl-ის ინტიმური სცენების კოორდინატორმა ინტერვიუში გადაღების პროცესზე დეტალურად ისაუბრა და აღნიშნა, რომ სიშიშვლის დონე და ინტიმური სცენებში დისტანცია მსახიობებთან წინასწარ იყო შეთანხმებული. გარდა ამისა, პრემიერამდე ფილმის ინტიმურ სცენებს საცდელ აუდიტორიას აჩვენებდნენ, რათა მაყურებელთა აზრიც წინასწარ სცოდნოდათ.

"ინტიმური სცენების დაგეგმვასა და გადაღებაში ბევრი ადამიანი იყო ჩართული, რათა დავრწმუნებულიყავით, რომ ჯენა ორტეგა თავს კომფორტულად გრძნობდა. გადაღებების პროცესში მსახიობებს აზრს ხშირად ვეკითხებოდით და მათი მოთხოვნების შესაბამისად ვმოქმედებდით", — ამბობს კრისტინა არჯორა.

არჯორას კომპანია Lionsgate-თან, რომელიც ფილმზე მუშაობდა, ხელშეკრულება ჰქონდა გაფორმებული, რომლის მიხედვითაც, მუშაობის პროცესზე საჯაროდ საუბარი ეკრძალებოდა.

კინომსახიობთა გილდია დიდი ხანია მსჯელობს ინტიმური სცენების კოორდინატორის როლზე. მათ 2022 წელს შემოიღეს პროგრამა, რომლის გავლის შემდეგად ადამიანები ინტიმური სცენების აკრედიტირებული კოორდინატორები ხდებიან, თუმცა აკრედიტაციის გადაწყვეტილებას გილდია სხვა ორგანიზაციებთან შეთანხმებით იღებს. ამჟამად კინომსახიობთა გილდიაში 77 აკრედიტირებული კოორდინატორია დარეგისტირირებული.