დონეცკის თვითგამოცხადებული რესპუბლიკის მეთაური, ალექსანდრ ზახარჩენკო, უკრაინის ტერიტორიაზე, ახალი სახლემწიფოს, მალოროსიის (Малороссия) შექმნის წინადადებით გამოვიდა. ამის შესახებ ინფორმაციას რუსული მედია დოჟდი ავრცელებს.

ზახარჩენკოს განცხადებით, მალოროსიის დედაქალაქი დონეცკი იქნება, თუმცა კიევი ისტორიულ-კულტურული ცენტრის სტატუსს შეინარჩუნებს.

ზახარჩენკო, ასევე, სამი წლით, საგანგებო სიტუაციის გამოცხადების ინიციატივით გამოვიდა, რომლის დროსაც ნებისმიერი პარტიის საქმიანობა შეიზღუდება.

"ეს გადაწყვეტილება უკვე დიდი ხანია მიღებულია, თუმცა ყველაფერს თავისი დრო აქვს. დღეს კი იმ ვარიანტს გთავაზობთ, რომელიც ომს შეაჩერებს", - განაცხადა მან.

ოფიციალური კრემლი ზახარჩენკოს განცხადებაზე ამბობს, რომ ეს მხოლოდ მისი ინიციატივაა. დმიტრი პესკოვის თქმით, რუსეთის ხელისუფლებამ ამის შესახებ მედიისგან გაიგო და მინსკის შეთანხმების ერთგული რჩება.

უკრაინის პრეზიდენტმა, პეტრო პოროშენკომ ზახარჩენკოს იდეაზე უარი თქვა.

აღმოსავლეთ უკრაინაში კონფლიქტი 2014 წელს დაიწყო. რუსეთი უარყოფს ბრალდებებს, რომ აღნიშნულ რეგიონებში ძირითადად რუსულენოვან სეპარატისტებს იარაღითა და სამხედრო ძალით ეხმარება.