ლივერპულელი ოთხეულის ცხოვრებას მალე უფრო ახლოდან გავიცნობთ. ლეგენდარულ The Beatles-ზე ოთხ ფილმს გადაიღებენ — თითოეული ჯგუფის ერთი კონკრეტული წევრის პერსპექტივით გვიჩვენებს "ყველა დროის უდიდესი ბენდის განმაცვიფრებელ ისტორიას".

ფილმების რეჟისორი ოსკარის ნომინანტი სემ მენდესი იქნება. პოლ მაკარტნიმ, რინგო სტარმა და გარდაცვლილი ჯონ ლენონისა და ჯორჯ ჰარისონის ოჯახებმა ფილმის შემქმნელებს არქივზე წვდომისა და მუსიკის გამოყენების უფლებები სრულად გადასცეს. მართალია, The Beatles-ზე აქამდე არაერთი დოკუმენტური ფილმი გადაუღიათ, თუმცა, ეს პირველი შემთხვევაა, როცა პროექტი უშუალოდ ჯგუფის წევრებისა და მათი ოჯახების მხარდაჭერით ხორციელდება.

"ჩემთვის დიდი პატივია, ყველა დროის უდიდესი როკჯგუფის ამბავს მოვყვე", — აღნიშნავს მენდესი, რომელსაც ჯეიმს ბონდის ფილმებზეც უმუშავია.

რეჟისორის სკამთან ერთად, მენდესი პროექტში პროდიუსერის როლსაც მოირგებს. ფილმების აღმასრულებელი პროდიუსერი კი The Beatles-ის დაფუძნებული ორგანიზაციის, Apple Corps Limited-ის, წარმომადგენელი ჯეფ ჯონსი იქნება.

"ჩვენი მიზანია, ეს პროექტი გამორჩეულად ამაღელვებელ, ეპიკურ კინომოვლენად ვაქციოთ: ოთხი ფილმი, ოთხი განსხვავებული პერსპექტივით მოყოლილი ერთი ამბავი ყველა დროის ყველაზე სახელგანთქმულ ჯგუფზე", — ამბობს ჰარისი, — "დიდი პატივია ისიც, რომ პროექტს The Beatles-ისა და Apple Corps-ის მხარდაჭერა აქვს".

///

როგორც ვიცით, ოთხივე ფილმი ერთ წელს გამოვა — 2027-ში. სხვა დეტალები მათ შესახებ ჯერჯერობით უცნობია.

ფოტო: John Pratt / Keystone / Getty

The Beatles მუსიკის ისტორიაში ყველაზე პოპულარულ ჯგუფად მიიჩნევა: მსოფლიოში ბენდის გაყიდული ჩანაწერების რაოდენობა 600 მილიონს აღწევს. ინგლისური როკმუსიკის კლასიკად ქცეული ოთხეული ლივერპულში 1960 წელს ჩამოყალიბდა. ათწლიანი არსებობის განმავლობაში კი, The Beatles-მა მუსიკალური ჩარტების ლიდერობით არაერთი რეკორდი მოხსნა. ამასთან, ბენდს მიღებული აქვს გრემის შვიდი ჯილდო და ოსკარიც. ჟურნალ Rolling Stone-ის მიერ 2004 და 2011 წლებში შედგენილ ასეულში — ყველა დროის უდიდესი შემსრულებლები — The Beatles პირველ ადგილზე იყო. გამოცემა Time-მა ჯგუფი მე-20 საუკუნის 100 ყველაზე გავლენიან ადამიანს შორისაც დაასახელა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...