აკა მორჩილაძე ლიტერატურის დარგში ნობელის პრემიის კანდიდატად წარადგინეს — ამის შესახებ სოციალურ ქსელში ინფორმაციას ქართული ლიტერატურის ინსტიტუტი ავრცელებს.

"სიხარულით გაცნობებთ, რომ შოთა რუსთაველის სახელობის ქართული ლიტერატურის ინსტიტუტის სამეცნიერო საბჭოსა და ივანე ჯავახიშვილის სახელობის თბილისის სახელმწიფო უნივერსიტეტის ჰუმანიტარული ფაკულტეტის პროფესორთა მიერ, ხმათა უმრავლესობით, შვედეთის ნობელის კომიტეტში, ლიტერატურის დარგში ნობელის პრემიის კანდიდატად წარდგენილია ქართველი მწერალი აკა მორჩილაძე (გიორგი ახვლედიანი). ვულოცავთ და ვუსურვებთ წარმატებას", — წერია განცხადებაში.

აკა მორჩილაძე თანამედროვე ქართული ლიტერატურის ერთ-ერთი ყველაზე ცნობადი სახეა. მას ოცამდე რომანი და მოთხრობების რამდენიმე კრებული აქვს გამოშვებული. მკითხველების რჩეულ ნაწარმოებებს შორისაა მოგზაურობა ყარაბაღში, სანტა-ესპერანსა, მადათოვი, ობოლე, კუპიდონი კრემლის კედელთან და სხვები.