19 ივლისს, 19:00 საათზე, აღმაშენებლის გამზირზე, ქართველთა მარშის ორგანიზატორების წინააღმდეგ, ქალის გაუპატიურების ღია მუქარის გამო, ქალთა სოლიდარობის მარში ჩატარდება.

დემონსტრანტები რკინიგზელთა კულტურის სახლის წინ, შეიკრიბებიან და უთანასწორობის, ძალადობისა და ჩაგვრის წინააღმდეგ სოლიდარობის მარშს გამართავენ. აქციის მონაწილეების მოთხოვნები ასეთია:

  • დაისაჯონ მოძალადეები, რომლებიც ჯგუფური გაუპატიურებით ემუქრებოდნენ ქალს;
  • მივიღოთ კანონი სექსუალური შევიწროების წინააღმდეგ;
  • ხელისუფლება და პოლიტიკური პარტიები ღიად გაემიჯნონ ძალადობას და ფაშიზმს;
  • მოვუწოდებთ მედიას, შეწყვიტონ სიძულვილის ენის და ფაშისტური რიტორიკის ტირაჟირება და არ მიიწვიონ გადაცემებში ის ადამიანები, რომლებიც გამოირჩევიან ძალადობრივი მოწოდებებით.

"ქალების ბრძოლა იწყება. ️ჩვენ ვერ გაგვაჩუმებს მუქარა და სიძულვილი! ჩვენ არ მოვითმენთ ჩაგვრასა და ძალადობას! დროა, ომი გამოვუცხადოთ მჩაგვრელს. გავერთიანდეთ სიძულვილის წინააღმდეგ და დავრწმუნდეთ, რომ უთანასწორობასთან ბრძოლაში ჩვენი ერთსულოვნება და სოლიდარობა გადამწყვეტია", - აცხადებენ ქალთა უფლებადამცველები.

ქალთა მარში ორგანიზატორები არიან:

  • საფარი;
  • ქალები საქართველოდან;
  • ქალთა მზერა;
  • ქალთა მოძრაობა;
  • თანასწორობის მოძრაობა;

"მოგიწოდებთ ყველას, ვისთვისაც ღირებულია ადამიანის სიცოცხლე და ღირსება, ვისთვისაც ღირებულია ადამიანის უფლებები და თავისუფლება, ვისთვისაც მნიშვნელოვანია ჩვენი ქვეყნის განვითარება - შემოგვიერთდით ანტიფაშისტურ მასობრივ მსვლელობაში", - წერენ ორგანიზატორები.