რეპერმა გიორგი პავლიაშვილმა, იგივე მასტერმა, სოციალურ ქსელში ცოტა ხნის წინ ქეთი მელუასთან დუეტის შესახებ პოსტი გამოაქვეყნა. მასტერის თქმით, ქეთი მელუა დუეტ Tbilisi London-ის აღებას ითხოვს. როგორც მასტერი განმარტავს, ამის მიზეზად ქეთი მელუას ლეიბლმა LGBT ორგანიზაციებისგან მიღებული საჩივრების სიმრავლე დაასახელა.

"ქეთი მელუას ლეიბლმა და თავად მომღერალმა მიიღო გადაწყვეტილება, რომ გააუქმოს ჩვენი დუეტის ლიცენზია, ანუ მოითხოვეს სიმღერის აღება. მიზეზად კი დასახელდა ქართული LGBT ორგანიზაციებისგან მიღებული საჩივრების სიმრავლე", — წერს მასტერი ფეისბუქის პოსტში.

მასტერის განცხადებაში ასევე ნათქვამია, რომ დუეტის აღება მას შემდეგ მოსთხოვეს, რაც The Drag Ball-ზე ნანი ბრეგვაძის მიწვევა გააპროტესტა.

"ყურადსაღებია, რომ ეს მას შემდეგ მოხდა, რაც პროტესტი გამოვხატე ფაქტზე, რომელიც ეხებოდა ნანი ბრეგვაძის "დრაგ ბოლზე" მიწვევას. ნანიმ ივენთზე აღარ იმღერა და ახლა ალბათ მათი მხრიდან "რევანშის" დრო იყო. ვფიქრობ სრულიად უსამართლოა ეს გადაწყვეტილება, რადგან ამ კონკრეტულ სიმღერას არ ჰქონდა არანაირი შეხება ამ თემასთან და მასზე დაიხარჯა უდიდესი დრო და ენერგია, არ იფიქროთ ვწუწუნებდე ამ თემაზე, უბრალოდ ყველა ჩემი სიმღერა ჩემთვის ძვირფასია, მითუმეტეს როცა მსმენელი მას ასე იყვარებს", — წერს მასტერი.

The Drag Ball ქვიარ კულტურის მნიშვნელოვანი ნაწილია, რომელიც საქართველოში უკვე რამდენიმე წელია, Tbilisi Pride-ის ორგანიზებით ტარდება. შეგახსენებთ, რომ The Drag Ball-ის წლის ბოლო ღონისძიებაზე ნანი ბრეგვაძეს უნდა ემღერა. მოგვიანებით კი, The Drag Ball-ის სოციალურ ქსელში ორგანიზაციამ გაავრცელა განცხადება, რომ ჯანმრთელობის მდგომარეობის გამო მომღერალი ღონისძიებაზე დასწრებას ვეღარ შეძლებდა.

რაც შეეხება ქეთი მელუასა და მასტერის დუეტ Tbilisi London-ს, იუთუბზე სიმღერის მოსმენა ჯერჯერობით შესაძლებელია. ქეთი მელუა ერთ-ერთი ყველაზე წარმატებული მომღერალია, რომელსაც ამ დრომდე ჯამში ცხრა სტუდიური ალბომი აქვს გამოშვებული. ზედიზედ ორი წლის განმავლობაში მელუა გაერთიანებულ სამეფოში ყველაზე გაყიდვადი ჩანაწერების მქონე მუსიკოსი ქალი იყო. 2008 წელს ქეთი 30 წლის ასაკს ქვემოთ მე-7 ყველაზე მდიდარ ბრიტანელ მუსიკოსად დასახელდა. 2021 წელს მელუამ ევროპის კულტურის ჯილდოც მიიღო.