მოკლედ: მაისის სტუდენტურმა მოძრაობამ თსუ-ს კანცელარია დაიკავა. სტუდენტები, ამჟამად, კანცელარიის ოთახში იმყოფებიან და ამბობენ, რომ არ დატოვებენ, ვიდრე მათი მოთხოვნები არ შესრულდება.

დეტალები: სტუდენტებს ორი მოთხოვნა აქვთ:

  • გათავისუფლდნენ კეკელიძის ქუჩაზე, ხატიაშვილების ოჯახის გამოსახლების დროს დაკავებული კაკო ჩიქობავა და გიორგი ხასაია.
  • აიკრძალოს უკანასკნელი საცხოვრებლიდან ადამიანების გამოსახლება.

ამას გარდა, ამბობენ, რომ აუცილებელია უნივერსიტეტმა თავისი მკაფიო პოზიცია დააფიქსიროს მათი თანამშრომლის, კაკო ჩიქობავას დაკავებასთან დაკავშირებით.

ჩიქობავა თსუ-ში ისტორიას ასწავლის.

სტუდენტები უნივერსიტეტს და ლექტორებს გაფიცვისკენ მოუწოდებენ.

სტრიქონებს შორის: მოძრაობა ხმის წევრები, გიორგი ხასაია და კაკო ჩიქობავა პოლიციამ კეკელიძის ქუჩაზე, ხატიაშვილების ოჯახის გამოსახლების დროს დააკავა და გუშინ მათ პატიმრობა (ე.წ. წინასწარი პატიმრობა) შეეფარდათ.

ხასაიას და ჩიქობავას ბრალად აღსრულების პოლიციის მანქანის დაზიანება ედებათ და 3-დან 6 წლამდე პატიმრობა ემუქრებათ.

უნივერსიტეტის პირველი კორპუსის მიმართულებით მიდიან ახლა ზანდუკელის ქუჩაზე შეკრებილი მოქალაქეებიც — ისინი ბალახაძეების ოჯახის გამოსახლებისთვის ხელის შესაშლელად, ზანდუკელის #2-ში დილიდან იყვნენ შეკრებილები, ბალახაძეების ოჯახის გამოსახლება გადაიდო.