2024 წლის ევროვიზიის სიმღერის კონკურსზე საქართველოს ნუცა ბუზალაძე წარადგენს. ამის შესახებ ცოტა ხნის წინ გახდა ცნობილი.

წლევანდელ ევროფესტივალზე საქართველოს წარმომადგენელი საზოგადოებრივმა მაუწყებელმა პირდაპირი გზით, შიდაშესარჩევი კონკურსის გარეშე დაასახელა. ჯერჯერობით უცნობია, რა სიმღერას შეასრულებს 26 წლის მუსიკოსი შვედეთში დაგეგმილ კონკურსზე.

"ოცნებები ხდება", — წერს ბუზალაზე ინსტაგრამზე, — "ეს არის ძალიან დიდი პასუხისმგებლობა და გპირდებით, მთელ გულსა და სულს ჩავდებ ამ ყველაფერში, რომ მაისში ჩემი საყვარელი ქვეყანა და ხალხი ვასახელო".

აღსანიშნავია, რომ ნუცა ბუზალაძე ევროვიზიის შიდაშესარჩევ კონკურსში 2017 წელსაც მონაწილეობდა. მომღერალმა მაშინ მე-2 ადგილი დაიკავა.

მანამდე, 2014 წელს, ბუზალაძე გახდა საერთაშორისო კონკურს ახალი ტალღის გამარჯვებული. გასულ წელს იგი ასევე მონაწილეობდა American Idol-ში.

ფოტო: Nutsa Buzaladze / Facebook

გასული წლის ივნისში ნუცა ბუზალაძემ რუსეთში იმღერა, რის გამოც საზოგადოების კრიტიკა დაიმსახურა. 24 ივნისს ინტერნეტსივრცეში გავრცელდა ვიდეო, სადაც ჩანდა, რომ რამდენიმე ქართველი მომღერალი, მათ შორის, ნუცა ბუზალაძე, დათო ხუჯაძე, მიშო სულუხია და სხვები მოსკოვის ერთ-ერთ რესტორანში ერთობოდნენ. მომღერლებმა ღონისძიებაზე სიმღერა სამშობლოც შეასრულეს.

ვიდეოებში ვნახეთ რუსეთში მოღვაწე მომღერალი სოსო პავლიაშვილი და მეგი გოგიტიძე, რომელიც უკრაინის ომის ფონზეც აგრძელებდა რუსეთში სიმღერას. წვეულებას ესწრებოდა პუტინისტური ძალადობრივი ჯგუფის, ალტ-ინფოს დამფუძნებელი, კონსტანტინე მორგოშიაც. დაბადების დღიდან ვიდეოები სოციალურ ქსელში ეკატერინა სტეფანოვამაც გაავრცელა. მოგვიანებით ბუზალაძემ რუსეთში სიმღერისთვის ბოდიში მოიხადა.

რიგით 68-ე ევროვიზიის სიმღერის კონკურსს შვედეთის ქალაქი მალმე უმასპინძლებს. წლევანდელი ევროფესტივალის ნახევარფინალური შოუები 7 და 9 მაისს, ფინალი კი 11 მაისს გაიმართება. კონკურსში 37 ქვეყანა მიიღებს მონაწილეობას.

საქართველო ევროვიზიაზე წელს უკვე მეთექვსმეტედ წარდგება. არცთუ ხანმოკლე მონაწილეობის მიუხედავად, ქვეყნის საუკეთესო შედეგად კონკურსზე მე-9 ადგილი რჩება, რომელიც 2010 წელს სოფო ნიჟარაძემ, 2011 წელს კი ჯგუფმა Eldrine დაიკავეს. ამასთან, შარშან საქართველო ზედიზედ მეექვსედ დარჩა ფინალს მიღმა.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...