რა ხდება: ირანში, გენერალ ყასემ სოლეიმანის მკვლელობიდან მეოთხე წლისთავის აღსანიშნავ მსვლელობაზე, 2 ბომბი აფეთქდა, დაიღუპა სულ მცირე 103 ადამიანი.

  • ადგილობრივი მედიის ინფორმაციით, ათობით ადამიანი დაშავდა.

დეტალები: აფეთქება საჰებ ალ-ზამანის მეჩეთთან, ირანის სამხრეთით მდებარე კერმანში მოხდა. კერმანი ყასემ სოლეიმანის მშობლიური ქალაქი იყო.

  • ირანული მედიის ინფორმაციით, პირველი ბომბი, ადგილობრივი დროით, 14:50 წუთზე აფეთქდა, მეორე კი, დაახლოებით, 15 წუთის შემდეგ. ორივე აფეთქება სოლეიმანის საფლავთან ახლოს მოხდა.
  • საინფორმაციო სააგენტო Tasnim-ი წყაროებზე დაყრდნობით წერს, რომ ბომბები ადგილზე ჩანთებით მიიტანეს, შემდეგ კი, სავარაუდოდ, დისტანციური მართვის პულტით ააფეთქეს.
  • ირანული წითელი ნახევარმთვარის ინფორმაციით, მოკლულებს შორის არის სასწრაფო დახმარების სულ მცირე 1 ექიმი, რომელიც ადგილზე პირველი აფეთქების შემდეგ მივიდა, ის მეორე აფეთქებას ემსხვერპლა.
  • კერმანის გუბერნატორის მოადგილის თქმით, ეს "ტერორისტული აქტი" იყო.
  • ჯერჯერობით, არ არის ცნობილი, ვინ დგას აფეთქებების უკან.
  • გავრცელებულ კადრებში ჩანს, რომ სოლეიმანის საფლავი დაზიანებული არ არის.
  • ინციდენტი მოხდა რეგიონში დაძაბულობის ფონზე — მას შემდეგ, რაც ლიბანში, სავარაუდოდ, ისრაელმა, მოკლა ჰამასის ლიდერის მოადგილე.

ბოლო ხაზი: ყასემ სოლეიმანი ირანში უზენაესი ლიდერის, აიათოლა ალი ხამენეის შემდეგ, ყველაზე გავლენიან ფიგურად მოიაზრებოდა. ის ირანის ელიტური ძალების, ყუდსის მეთაური იყო. სოლეიმანი 2020 წლის იანვარში, ერაყში, აშშ-ის უპილოტო თვითმფრინავის თავდასხმის შედეგად დაიღუპა.