მასირებული თავდასხმა უკრაინაზე — დაიბომბა კიევი, ლვოვი და ოდესაც, არის მსხვერპლი

მოკლედ: ღამით უკრაინაზე მასშტაბური თავდასხმა იყო, აფეთქებები ისმოდა კიევში, ლვოვში, ხარკოვში, ოდესაში, დნეპრსა და სხვა ქალაქებში.

დაიღუპა 12 ადამიანი, დაშავდა 75-ზე მეტი.
ცნობილი გახდა, ასევე, აფეთქებების შესახებ პოლტავის, დნეპროპეტროვსკის და ზაპოროჟიეს ოლქებში.

ვითარება კიევში: დილით კიევსა და სხვა ქალაქებში საჰაერო თავდაცვამ დაიწყო მოქმედება. დედაქალაქში, ოთხ რაიონში, რაკეტების ნამსხვრევების ჩამოვარდნას ნგრევა მოჰყვა.

პოდოლსკის რაიონში, საწყობების ტერიტორიაზე გაჩნდა ხანძარი.
ხანძარი გაჩნდა, ასევე, მრავალსართულიან სახლშიც, სვიატოშინსკის რაიონში.
ამ დროის ინფორმაციით, კიევში 17 დაშავებულია.
მერის, ვიტალი კლიჩკოს განცხადებით, რამდენიმე ადამიანი ნანგრევებში მოჰყვა.
აფეთქებმა დააზიანა, ასევე, მეტრო "ლუკიანოვსკაია", რომელიც ბომბსაფრად გამოიყენებოდა.
სახლი დაზიანდა დარნიცკის რაიონშიც.

ვითარება ლვოვში: სულ მცირე ერთი ადამიანი დაიღუპა.

ქალაქის მერის ინფორმაციით, დაჭრილია 8 ადამიანი.
ღამით ქალაქის მერმა, ანდრეი სადოვოიმ განაცხადა, რომ ლვოვის ოლქს 10-ზე მეტი კამიკაძე-დრონით დაესხნენ, კრიტიკული ინფრასტრუქტურის ობიექტებზე გაჩნდა ხანძარი.

ვითარება ხარკოვში: თავდასხმების შედეგად, ერთი ადამიანი დაიღუპა,35 წლამდე მამაკაცი.

დაშავდა 8 ადამიანი, მათ სამედიცინო დახმარებას უწევენ.
დაზიანებულია სამოქალაქო ინფრასტრუქტურა - სამედიცინო დაწესებულებები, საწყობები, სამოქალაქო საწარმოები.
მანამდე ხარკოვის მერმა, იგორ ტერეხოვმა მასიური სარაკეტო თავდასხმის სამი ტალღის შესახებ განაცხადა. თავდაპირველად, სულ მცირე ექვსი აფეთქება მოხდა, შემდეგ დაფიქსირდა კიდევ ოთხი, საბოლოოდ კი მესამედაც შეუტიეს. მერის თქმით, წინასწარი მონაცემებით, ქალაქს თავს დაესხნენ ორი ტიპის რაკეტებით - S-300 და Kh-22-ით.

რა ხდება ოდესაში: დაიღუპა 2 ადამიანი, დაიჭრა 15, მათ შორის 2 ბავშვი.