რა ხდება: კორონავირუსის ომიკრონის ვარიანტის ქვეშტამი, JN. 1 მსოფლიო ჯანდაცვის ორგანიზაციამ ინტერესის ვარიანტად გამოაცხადა, რადგან ამ ქვეშტამით სულ უფრო მეტი ადამიანი ავადდება და სწრაფად ვრცელდება.

დეტალები: ეს ქვეშტამი უკვე მსოფლიოს ბევრ ქვეყანაში დაფიქსირდა, მათ შორის ინდოეთში, ჩინეთში, დიდ ბრიტანეთსა და აშშ-ში.

  • ჯანმო აცხადებს, რომ ახალი ვარიანტი ჯანმრთელობისთვის დიდ საფრთხეებს არ ქმნის და კოვიდის საწინააღმდეგო ვაქცინები ამ ქვეშტამისგანაც გვიცავს.
  • თუმცა, ასევე, გვაფრთხილებენ, რომ ზამთარში კოვიდისა და სხვა ინფექციების მაჩვენებელი მაღალი იქნება.

რა ვიცით JN.1-ზე: ომიკრონი, ბოლო პერიოდის განმავლობაში, მთელ მსოფლიოში დომინანტი ვარიანტია.

  • ჯანდაცვის მსოფლიო ორგანიზაცია აღრიცხავს ინტერესის ვარიანტებს, რომელიც ომიკრონს უკავშირდება — მათ შორის, JN.1-ს.
  • ეს ქვეშტამი სწრაფად ვრცელდება მსოფლიოს ბევრ ქვეყანაში, მათ შორის აშშ-ში.
  • ამერიკის დაავადებათა კონტროლისა და პრევენციის ცენტრის ინფორმაციით, ინფექციების 15-29 პროცენტი სწორედ ახალი ქვეშტამია.
  • დიდ ბრიტანეთში JN.1 კორონავირუსის დადასტურებული შემთხვევების 7%-ია.
  • "მოსალოდნელია, რომ ამ ვარიანტმა შეიძლება გამოიწვიოს Sars-Cov-2 (კორონავირუსის) შემთხვევების ზრდა სხვა ვირუსული და ბაქტერიული ინფექციების მატების ფონზე, განსაკუთრებით იმ ქვეყნებში, სადაც ახლა ზამთარია", — ნათქვამია ჯანმო-ს განცხადებაში.

ჯერჯერობით, არ არსებობს ინფორმაცია იმის შესახებ, რომ ეს ქვევარიანტი უფრო მძიმე მიმდინარეობით ხასიათდება. თუმცა, იმისთვის, რომ დადგინდეს, რა გავლენას ახდენს JN.1 ადამიანის ჯანმრთელობაზე, მეტი კვლევაა საჭირო.

როგორ დავიცვათ თავი ინფექციებისგან — ჯანდაცვის მსოფლიო ორგანიზაციის რეკომენდაციები:

ატარეთ ნიღაბი ხალხმრავალ ადგილებში;

აიფარეთ სახეზე ხელსახოცი ცემინებისა და ხველის დროს;

დაიბანეთ ხელები რეგულარულად;

ჩაიტარეთ კოვიდის და გრიპის საწინააღმდეგო ვაქცინაცია, განსაკუთრებით, თუ რისკჯგუფში ხართ;

დარჩით სახლში ავადობის შემთხვევაში;

თუ სიმპტომები გაქვთ, ჩაიტარეთ კვლევა.