მოკლედ: ირაკლი კობახიძე მიიჩნევს, რომ დღევანდელ ღონისძიებაზე, რომელიც კანდიდატის სტატუსის მიღებას უკავშრდება, "არაფერი ესაქმება ოპოზიციას და პრეზიდენტს".

ამის შესახებ პარტია "ქართული ოცნების" თავმჯდომარემ პარლამენტში გამართულ ბრიფინგზე განაცხადა.

დეტალები: კობახიძეს არგუმენტად მოჰყავს ის, რომ სალომე ზურაბიშვილი და "რადიკალური ოპოზიცია" ქვეყნის წინააღმდეგ საბოტაჟს ეწეოდნენ.

"დღევანდელი ღონისძიება ეძღვნება ხალხს, რომელმაც ყველაფერი გააკეთა კანდიდატის სტატუსის მისაღებად. რაც შეეხება რადიკალურ ოპოზიციას, ისინი ყველაფერს აკეთებდნენ, რომ ქვეყანას არ მიეღო კანდიდატის სტატუსი. მათ შორის, ერთ-ერთი, ვინც იდგა ამ საბოტაჟის ავანგარდში, იყო სალომე ზურაბიშვილი. რა თქმა უნდა, ასეთ ადამიანებს არაფერი ესაქმებათ საზეიმო ღონისძიებაზე, მით უმეტეს ასეთ ადამიანებს არაფერი ესაქმებათ საზეიმო სცენაზე. ეს არის ჩვენი ძალიან მყარი პოზიცია", — თქვა კობახიძემ.

ვინ აპირებს ღონისძიებაზე მისვლას: მას შემდეგ, რაც გუშინ, პრემიერ-მინისტრმა თქვა, რომ 15 დეკემბერს, 17 საათზე, თავისუფლების მოედანზე სახალხო ზეიმი გაიმართებოდა, სალომე ზურაბიშვილმა განაცხადა, რომ აპირებს ღონისძიებას შეუერთდეს.

"თუ ტრიბუნაზე მიმიწვევენ, კარგი, თუ არა, ხალხში ვიქნები", — თქვა პრეზიდენტმა.

ღონისძიებაზე დასწრების სურვილი გამოთქვა ოპოზიციის ნაწილმაც, რადგან მათ მიაჩნიათ, რომ კანდიდატის სტატუსი არის მთელი ქვეყნის მონაპოვარი და ეს ყველამ ერთად უნდა იზეიმოს. მათ შორის, ვინც მისვლას გეგმავენ, არიან ლელოს წევრები ანა ნაცვლიშვილი და სალომე სამადაშვილი, რესპუბლიკური პარტიის ლიდერი, ხათუნა სამნიძე, დეპუტატი თამარ კორძაია, პარტია საქართველოსთვის წევრი მიხეილ დაუშვილი.

ბოლო ხაზი: საქართველოს ევროკავშირის კანდიდატი ქვეყნის სტატუსი გუშინ, 14 დეკემბერს მიანიჭეს.