კიმ კარდაშიანი სამსახიობო კარიერას ისევ აგრძელებს და მხოლოდ American Horror Story-ზე არ ჩერდება! ცოტა ხნის წინ კიმი რაიან მერფის გახმაურებული საშინელებათა ჟანრის სერიალის, American Horror Story-ის, მე-12 სეზონში ვიხილეთ, ახლა კი ცნობილი გახდა, რომ რეჟისორის კიდევ ერთ სერიალში ითამაშებს.

Deadline-ის ინფორმაციით, ახალ სერიალში კიმ კარდაშიანს ადვოკატის როლში ვიხილავთ. ახალი სერიალის სიუჟეტის მიხედვით, კიმის პერსონაჟი განქორწინების საქმეებში ლოს-ანჯელესის ყველაზე წარმატებული ადვოკატია, რომელსაც საკუთარი იურიდიული ფირმაც აქვს. სერიალის აღმასრულებელი პროდიუსერი კი კრის ჯენერი იქნება.

კიმ კარდაშიანს, მართალია, აქამდეც უთამაშია ფილმებში, თუმცა, წამყვანი როლი American Horror Story-მდე არ ჰქონია. American Horror Story-ში პერსონაჟი საგანგებოდ კიმისთვის შეიქმნა და ტელევარსკვლავი მთავარ როლში პირველად ვიხილეთ. ასე რომ, კიმის ფანები ახალი სერიალის გამოსვლას კიდევ უფრო დიდი ინტერესით ელიან.

შეგახსენებთ, რომ კიმის ოჯახის რეალითი შოუს, Keeping up with the Kardashians, 20 სეზონის განმავლობაში მილიონობით მაყურებელი ადევნებდა თვალს. გადაცემა 14-წლიანი ისტორიის შემდეგ 2021 წელს დასრულდა, თუმცა, 2022 წელს ოჯახი ახალი რეალითი შოუთი — The Kardashians — დაბრუნდა, რომელიც პოპულარული მალევე გახდა.