თუ გრძნობ რომ ცხოვრების რაღაც ეტაპზე გაჩერდი და წინ ვერ მიიწევ, ამ თევზის ამბავმა შეიძლება მდგომარეობა შეგიმსუბუქოს.

ტიმ სემუელი, რომელიც ოკეანის ფოტოების გადაღებითაა დაკავებული, ავსტრალიის აღმოსავლეთ სანაპიროს სიახლოვეს მორიგი ფოტოსესიის დროს უცნაური სცენის შემსწრე გახდა.

პატარა ყვითელი თევზი გამჭვირვალე მედუზის შიგნით იყო გამოკეტილი. ტიმმა ფოტო გადაიღო და ინსტაგრამზე გამოაქვეყნა.

ფოტო: Tim Samuel

ფოტო მას შემდეგ გავირუსდა, რაც Discover Ocean-მა ის თავის გვერდზე გადაიტანა. მოგვიანებით ფოტოგრაფმა თავისი ნამუშევარი Reddit-ზეც გამოაქვეყნა, რამაც ფოტოს პოპულარობა კიდევ უფრო გაზარდა.

"დილით გავიღვიძე და ჩემი მობილური შეშლილივით რეკავდა, რაც ფოტოს გავირუსების შედეგი იყო. მართლა უცნაურია, რამხელა ყურადღება მიიპყრო ამ პატარა თევზმა" - ამბობს ის.

სემუელმა ფოტო დეკემბერში გადაიღო. მისი თქმით, მანამდე მედუზაში მცხოვრები თევზი არ შეხვედრია.

"თევზის კუდი მედუზის გარეთ იყო და მოძრაობის სტიმულირებას სწორედ ის ახდენდა. 20 წუთის განმავლობაში ვუყურებდი ამ სცენას მეგობართან ერთად, თევზი მედუზას წონასწორობას აკარგვინებდა და ის წრეზე განაგრძობდა ცურვას. ზოგჯერ ისინი უბრალოდ ჩერდებოდნენ".

ფოტოგრაფმა CNN-ს უთხრა, რომ გადაწყვიტა თევზი არ გაეთავისუფლებინა და მისი ბედი ბუნებისთვის მიენდო.